Sagardoarekin lotuta, hainbat zita jarri dituzte datozen egunetan, Astigarragan. Ostiralean, bertso jaialdia eta afari-merienda egingo dute Astarbe sagardotegian, Sagardoak elkartzen gaitu ekimenaren barruan. Maialen Lujanbio eta Agin Laburu ariko dira, 18:30etan; eta sarrerak badaude oraindik, 25 euroan, sagardoa.eus eta bertsosarrerak.eus webguneetan. Menua ere, jakinarazi dute: Basatxerri urdaiazpiko pintxoa, bonito taloa, Cod chowder bakailu krema, txuleta pintxoa, euskal gazta taula, eta Astarbe sagardoa, Euskal Sagardoa Jatorri Deituraduna.
Larunbatean, berriz, Kilimak taldearen kontzertua izango da Astarben, 15:30etan; eta igandean, Bakean dagoena bakean utzi.
Eta igandean bertan, Santa Ana eguna etxean ospatzera deitu dituzte herritarrak. 12:00etan bideoa zabalduko dute Udalaren webgunean eta sare sozialetan; eta pack bereziak prestatu dituzte eguna ospatzeko, eskuragarri Sagardoetxean eta herriko hainbat establezimendutan.