Pausoak ematen jarraitzen du, irailean zabaltzekoa den Erribera kulturgune berriak. Eta oraingoan, logoa aukeratu du Astigarragako Udalak, azken asteotako prozesuaren ondoren: Noelia Lozanok egindakoa hautatu du, jasotako 13 proposamenen artean.
Sortzez donostiarra da Lozano, baina Astigarragan bizi da. Diseinatzaile grafikoa da, eta esperientzia haundia dauka komunikazio grafikoaren eta irudi korporatiboaren arloan, Udalak jakinarazi duenez.
«Ur urdin baten pintzeladak balira bezala irudikatu dut eraikin berezi hau»
Aurkeztutako logoan, kulturgunearen eraikinari eman nahi izan dio protagonismoa Lozanok, eta Erriberaren eta ibaiaren kolore urdinarekin margotu du: «logoa sortzerakoan, batetik, beharrezko protagonismoa eman nahi nion kultur etxe berria kokatuko den eraikinari, berezia baita; eta bestetik, ibaia eta Erribera izenaren kontzeptua ere irudikatu nahi nituen. Bi alderdi horiek batuz, ur urdin baten pintzeladak balira bezala irudikatu dut eraikin berezi hau», azaldu du egileak.
Proposamena aurkezterakoan, Piztu ezizena erabili zuen berak: «laster astigartar guztiok espazio berri hori gozatu eta bizitzaz betetzeko ideiatik dator, gutako bakoitzaren barruan kulturak sortzen duen argi hori piztuz», nabarmendu du.