Bihar zabalduko da Astigarragako igerilekua, zenbait segurtasun neurri eta baldintzekin. Gainera, aforoa mugatua izango da, eta jadanik irekita dago hitzordua eskatzeko epea, «lursailaren erreserba egiteko». Astigarragako Udalaren webgunean dagoen aplikaziotik eskatu daiteke hitzordua.
Aipatu moduan, igerilekuko ateak ireki dituzte, baina egungo egoera kontutan hartuta, hainbat baldintza ezarri dituzte, segurtasuna bermatzeko.
Igerilekura joan aurretik, lurzati bat erreserbatzeko hitzordua eskatu behar da udaleko webgunean dagoen aplikazioaren bidez, «lurzatiaren erreserbek 3 orduko iraupena izango dute». Eta bi motatako erreserbak egongo dira; indibidualak (pertsona bakarra) eta familiarrak (2-5 pertsona).
Igerilekuaren gehieneko edukiera mugatuko da, hori dela eta, igerileku txikian soilik 4 urte bitarteko haurrek egon ahal izango dute. Udalak azaldu du, 5 eta 8 urte bitartekoek igerileku haundian egon beharko dutela, heldu batekin. Horrez gain, igerileku txikian 12 pertsona sartu daitezke, eta haundian berriz 93.
Igerilekuko aldagela eta armairuak ezin izango dira erabili, itxita egongo baitira. Hori horrela, Udalak gomendatu du «beharrezkoa dena soilik eramatea».
Aurten gainera, ez da igeriketa ikastarorik izango, egoerak hala behartuta. Eta 12 urtetik beherako haurrek, heldu batekin joan beharko dutela azaldu du Udalak.
Hainbat segurtasun neurri, Covid-19a dela eta
Astigarragako Udalak, hainbat neurri ezarri ditu, herritarren eta bertako langileen segurtasuna bermatzeko, eta honakoak dira, besteak beste; «Covid-19aren sintomak izanez gero, ez etorri». Kiroldegira sartzeko desinfekzio neurriak bete. Sarrera eta irteerako jarraibideak errespetatu. Segurtasun distantziak mantendu. Maskarilarekin sartu behar da instalazioetan, hala ere, igerileku esparruan ez da derrigorrezkoa erabiltzea, «baldin eta 1,5 metroko distantzia mantentzen bada». Ez partekatu objektuak beste pertsonekin. Zaindu adingabeak baldintzak bete ditzaten eta beste erakunde ofizialek emandako osasun-neurriak».