Fisikoki ezin bada, internet bidez egingo dute bigarren Atsolorra, emakume astigartarren elkarretaratzea, Aztifemiak talde feministak antolatuta. Gaurko jarri dute hitzordua, arratsaldeko 18:00etan, eta parte hartu nahi duten emakume guztiak gonbidatu dituzte.
Zoom aplikazioaren bidez egingo dute, eta bilera birtualean parte hartu nahi duenak, aztifemiak@gmail.com helbide elektronikora idatzi behar du. Bueltan erantzungo diote, elkarretaratzean parte hartzeko jarraibideak bidaliz. «Gonbidatuta zaudete, zu eta zure inguruko emakumeak. Oraingo honetan ateak ez, lehioak zabalik dauzkagu!», luzatu diete deia.
Otsailaren 7an antolatu zuen aurreneko elkarretaratzea edo Atsolorra Aztifemiak taldeak, udaletxean, taldea bera eta ekimena aurkezteko herritarrei. Metaforikoa da Atsolorra, irudikatu nahi dutelako emakumeak elkartuko direla, ospatzeko beraien ekintzen sorrera.
Azkeneko asteotan, galdeketa ere zabaldu du Aztifemiak taldeak, interneten, Emakumeen Etxearen inguruan.
Indarkeria matxista jasateko arriskuan daudenentzat, arreta zerbitzua martxan
Astigarragako Udalak, bestalde, egun hauetan jarri du martxan Astigarragan Gertu zerbitzua. Indarkeria matxista jasateko arriskuan dauden emakumeei laguntzeko arreta zerbitzua da, eta 688 804 672 telefono zenbakian egingo dute. Bertara, deiak eta bideo-deiak egin, edota mezuak eta whatsappak bidali daitezke. Psikologo eta gizarte langileek osatutako profesional talde batek emango die «laguntza emozionala eta akonpainamendua», haiengana jotzen duten emakumeei.
Dagoeneko martxan dago zerbitzua, asteazkenetik, eta maiatzaren 10era arte izango da, astelehenetik igandera, goizeko 07:00etatik 21:00etara.
Eskainiko duten laguntza, beharraren araberakoa
Udalak jakinarazi du, mota ezberdinetakoa izango dela talde horrek eskainiko duen laguntza, beharraren arabera. Batetik, indarkeria matxistaren egoeren eraginpean dauden emakumeei, emozionalki lagunduko diete, alarma egoeraren aurretik zeuden kasuak izan, edo orain sortutakoak. Laguntza emango diete, bikotekideekin, seme-alabekin edo konfinamenduan etxean dauden beste batzuekin sortutako arazoen aurrean.
Bestetik, gizarte zerbitzuekin kudeatuko dute, sortu daitezkeen gizarte arloko arazoak; eta Udaltzaingoarekin, segurtasun arazoak. Beste laguntza motaren bat beharko balitz ere, udal edo erkidego mailako beste baliabide batzuekin batera kudeatuko lituzkete.
Gainera, beharrezkotzat joz gero, bideratuko lukete indarkeriaren biktima diren emakumeen arretarako Eusko Jaurlaritzak daukan zerbitzura, edo 112kora. Eta artatzen diren kasu guztiei, jarraipena egingo diete, alarma egoera indarrean dagoen bitartean.