Zerbait beranduago beste herritan baino, baina Astigarragatik ere pasatzen da Hungariara bueltako bidea, kaldereroentzat, eta urtero bezala, herrian egingo dute gaur azkeneko parada. 17:30etan Ergobiatik abiatu, eta Astigarragako kaleetan barrena ibiliko da Kaldereroen konpartsa, gaur arratsaldean.
Kalejira Joseba Barandiaran plazan amaituko da 20:00etan
Eta nola ez, ez dituzte faltako lapiko eta zartagiak. Mailu bana eskuan hartuta, kolpe eta kolpe emango diete, herrian hotsik falta ez dadin, azkeneko momentura arte.
Baina kolpe hotsekin bakarrik ez, kantuan ere alaituko dituzte Astigarragako kale eta plazak. Eta betiko moduan, zartagi, lapiko eta mailuak bezala, hartza ere lagun izango dute, ibilbide osoan zehar.
20:00ak aldera espero da Joseba Barandiaran plazara iristea eta kanpamendua bertan ezarriko dute.
Otsailean eguraldiaren zain ere egoten da jendea, horrek baldintzatu bait dezake konpartsa. Esan, gaurko ez dela eguraldi txarrik espero eta 20 gradutik gora igoko da tenperatura. Beraz, ez dago aitzakiarik kalera ez irteteko.
Zipotzan egingo dute afaria 21:00etatik aurrera
Baina ez dira tripa hutsarekin bueltatuko kaldereroak, Hungariara. Ibilbidean zehar geratzen diren lekuetan pintxoak eta jan edana izaten dute indarberritzeko eta festarekin jarraitzeko. Konpartsaren ibilbidea osatu ondoren, afaria ere egingo dute Zipotza elkartean, agurrik beroena emateko.
Bertan afaldu nahi duenak, txartelak salgai dauzka Zipotza tabernan 20 euroren truke. 21:00etan hasiko dira afaltzen elkartean bertan.