Azkenean izango da sagardotegietara joateko autobus zerbitzua, aurtengo txotx denboraldian ere. Gaur jarriko da martxan, eta ostiral gauetan eta larunbat eguerdi eta gauetan emango du zerbitzua.
Herriko sagardogileek antolatu dute garraio zerbitzua, Gipuzkoako Sagardogileen Elkartearen babesarekin eta Udalaren laguntzarekin.
20 lagunentzako autobusa
Martxan jarriko den garraio zerbitzua autobus txiki batek emango du. 20 lagunentzako tokia dauka, eta erabiltzaileek 2 euro ordainduko dute joan-etorri bakoitza.
Autobusa Donostia ibilbideko geltokitik aterako da, eta 11 sagardotegitan egingo du geldialdia: Artolan, Astarben, Bereziartuan, Etxeberrian, Irigoienen, Larrarten, Lizeagan, Minan, Oiarbiden, Petritegin eta Sarasolan; hain zuzen, zerbitzua antolatu duten sagardotegietan.
Zerbitzua, ostiral eta larunbatetan
Autobus zerbitzua gaur bertan jarriko da martxan, txotx denboraldi osorako, eta ostiral gauetan eta larunbat eguerdi eta gauetan ibili da.
Ostiral gauetan, sagardotegietara joateko 20:00etatik 21:15etako tartean ibiliko da joan-etorrian, eta sagardotegietatik itzultzeko, 23:00etatik 00:00etarakoan.
Larunbat eguerditan, 13:15etatik 14:00etara joan ahal izango da sagardotegietara, eta itzuli, 17:30etatik 18:30etara. Gauetan, berriz, 20:00etatik 21:15etara sagardotegietara joan, eta 23:00etatik 00:00etarako tartean itzuli.
Elkarlanean
Zerbitzua erabiltzaileek eta sagardogileek ordainduko dute; azken hauek 10.000 euro jarri dituzte.
Kalkuluen arabera, nahikoa izango da hori. Baina ez bada, hortik gorako kostuaren %60 ordainduko dute sagardogileek, eta beste %40 Sagardunek.
AUTOBUS ZERBITZUA
OSTIRALETAN
Sagardotegietara joateko,
20:00-21:15.
Sagardotegietatik itzultzeko, 23:00-00:00.
LARUNBAT EGUERDIETAN
Sagardotegietara joateko,
13:15-14:00.
Sagardotegietatik itzultzeko, 17:30-18:30.
LARUNBAT GAUETAN
Sagardotegietara joateko,
20:00-21:15.
Sagardotegietatik itzultzeko, 23:00-00:00.