Mari Errauskin antzezlana eskainiko du bihar, Astigarragako kultur etxean, Glu Glu konpainiak. Arratsaldeko 17:30etan izango da, eta sarrerak salgai daude, kultur etxean bertan; gaur egun osoan zehar, eta bihar emanaldia baino ordubete lehenago: haurrek 2,5 euro, eta helduek 5 euro.
Ipuin klasikoaren moldaketa, garai berrietara egokituta
Izenburu bereko ipuin klasikoaren moldaketa da, kultur etxeko eszenatokira ekarriko dutena. Horretarako, gaur egunera egokitu dute ipuina, eta Nora izeneko gaztetxoa izango da protagonista. Bere urtebetetzea ari da ospatzen, lagunekin batera, eta primeran ari da pasatzen, Lys iritsi arte: gelako liderra eta neskato harroputza. Festako guztia gutxietsiko du; bereziki, Norak opari jaso dituen zapata berriak, berak ere eduki nahiko lituzkeela eta, inbidia duelako.
Baina berarekin nazkatuta daude haurrak, eta erabaki dute ez diotela gehiago men egingo. Orain, zapata horiek izango dira ipuinera salto egiteko bidea, magikoak baitira; eta jolaserako darabilten erratza, Mari Errauskinen erratza magiko bilakatuko da. Horrela, egia bihurtuko da, Norak tartaren kandelak itzaltzean eskatutako desioa.
59 minutuko iraupena izango du antzezlanak, eta 3-9 urteko haurrei zuzenduta dago.