Otsailean hasiko dira Emakumeon Plaza hiritartzeko lanak, Astigarragako Udalak jakinarazi duenez eta lanak hasi aurretik, bi saio antolatu ditu Udalak, obren eta lanek eragingo dituzten aldaketen berri emateko: epeak, egingo diren lanak, trafiko aldaketak, obren inguruko sarbideak...
Atzo izan zen aurrenekoa, herritarrei zuzendua. Gaztelekuan eta bigarrena, gaur bertan egingo dute, plazaren inguruko ostalari eta merkatariekin, 15:00etan Joseba Barandiaran plazan, Gaztelekuaren aurrean. Helburua da «berreskuratzea izaerarik gabeko espazio publiko degradatu bat», eta bilakatzea oinezkoentzako gune, batetik; eta era berean, «merkataritza eta aisialdi jarduerarekin bat egingo duen oroitzapenezko gune», nabarmendu du. Horrela, emango zaio «Emakumeon Plazari dagokion nortasuna».
Estalpea, eszenatokia eta beirazko murala
Plazan jarriko dituzte estalpe bat eta eszenatoki bat; eta haien atzealdean, beirazko mural haundi bat. Nagore Legarreta eta herriko emakume eta taldeek egingo dute lan diseinuan».