Otsailean hasiko dira Emakumeon Plaza hiritartzeko lanak, Astigarragako Udalak jakinarazi duenez. Helburua da «berreskuratzea izaerarik gabeko espazio publiko degradatu bat», eta bilakatzea oinezkoentzako gune, batetik; eta era berean, «merkataritza eta aisialdi jarduerarekin bat egingo duen oroitzapenezko gune», nabarmendu du. Horrela, emango zaio «Emakumeon Plazari dagokion nortasuna».
Estalpea, eszenatokia eta beirazko murala, bertan
Zehazki, plazan jarriko dituzte estalpe bat eta eszenatoki bat; eta haien atzealdean, beirazko mural haundi bat: «benetako nortasuna eta izaera emateko, Nagore Legarreta argazkilaria eta herriko emakume eta taldeek egingo dute lan, muralaren diseinuan», aurreratu dute.
Udalak azaldu du, gainera, Emakumeon Plaza «erabat» berritzeaz gain, inguruan dituen hiru plazak (Sagardo plaza, Joseba Barandiaran plaza eta Pentagono plaza) elkartuko direla «oinezko-ardatz batean». Eta Emakumeon Plaza eta Tomas Alba kaleko «zati degradatuenaren azaleko hiritartzea» egingo dute: «batetik, kota guztiak berdinduko dira, irisgarritasun baldintzak hobetzeko; eta bestetik, euri-urak biltzeko sare berria sortuko da».
Sasoi Eraikuntzak SL enpresak egingo ditu lanak, eta zazpi hilabeteko epea aurreikusi dute. 850.151,38 euroko kostua izango dute, guztira.
Bilera bana gaur eta bihar, lanen berri emateko
Lanak hasi aurretik, bi saio antolatu ditu Udalak, obren eta lanek eragingo dituzten aldaketen berri emateko: epeak, egingo diren lanak, trafiko aldaketak, obren inguruko sarbideak...
Gaur izango da aurrenekoa, herritarrei zuzendua. Gaztelekuan jarri dute hitzordua, arratsaldeko 19:00etan. Eta bigarrena, bihar bertan egingo dute, plazaren inguruko ostalari eta merkatariekin, 15:00etan Joseba Barandiaran plazan, Gaztelekuaren aurrean.