Azkeneko asteak dira, Aiotzategi kaleko alokairu sozialeko etxebizitzen zozketan parte hartu nahi dutenentzat. Izan ere, bi aste barru, urtarrilaren 31n, bukatuko da epea, zozketarako izena emateko.
Zazpi etxebizitza zozketatuko ditu Astigarragako Udalak, Aiotzategi kaleko laugarren portalean: lau etxebizitza dira hiru logelakoak; beste bi, bi logelakoak; eta azkeneko etxebizitza, bi logelakoa, baina ezintasunen bat dutenentzat egokituta dagoena.
3.000 eta 39.000 euro bitarteko diru-sarrerak izan behar ditu eskatzaileak
Udaletxean eman behar da izena, eta 3.000 eta 39.000 euro bitarteko diru-sarrerak izan behar dituzte eskatzaileek. Hori bai, 25.000 eurotik beherakoek izango dute lehentasuna.
Zazpi urterako kontratua egiten da
Gaur egun okupatuta daude zazpi etxebizitzak, baina orain daudenei, martxoaren 31n bukatuko zaie kontratua; eta ordutik aurrera, zazpi urterako kontratua sinatuko dute berriek, baina urtero errebisatuko da, baldintzak betetzen direla egiaztatzeko.