Asteazkenean irekiko da 2020ko txotx denboraldia, Alorrenea sagardotegian, baina aurten ez da Murgia Jauregiko festa egingo, eta EAJk kexa azaldu du, «EH Bilduk txotx irekiera herrikoia kendu» duelako.
EAJk sustatutako festa, «arrakastatsua»
Jeltzaleek gogorarazi dute Murgiako Jauregiko festa azken hiru urteetan egin dela, EAJ-PNVk pasa den legegintzaldian sustatuta, eta «astigartarren artean arrakasta haundia» izan zuela. «Baina EH Bilduk erabaki du tradizioarekin ez jarraitzea».
Ekitaldi honekin EAJren asmoa izan zen «astigartar guztiak Txotx Berri Eguneko partaide egitea». Horretarako, Murgiako Jauregiko lorategia erabili zen, eta sagardoa eta pintxoak eskaintzeaz gain, «alderdirik tradizionalenean, hedapena izan zuen bakailao tortilak egiteko familiei zuzendutako tailerrak, eta baita ere, txokolatadak edota txikienentzako magia ikuskizunak», azaldu dute.
«Herritarrak ezinbestekoak dira gure tradizioak transmititzeko»
Honekin, EAJk gogorarazi du lehenago «txotx irekiera erakunde mailan bakarrik egiten» zela, eta horri eman nahi izan ziola buelta. «EAJrentzat, festa honen helburua izan da sagardoaren kultura aberastu eta dibertsifikatzea, herritarrei gerturatzea eta baita ere, herriko bizilagun berriei ezagutzera ematea».
Hori guztia medio, EAJk azaldu du «desengainatuta» dagoela. «Beti izan zen arrakastatsua. Herritarrak ezinbestekoak dira gure tradizioak transmitizeko, eta festa honek sagardoaren kultura herritarrari gerturatzen zion. EH Bilduk, ordea, txotx irekiera erakundeetara eta tabernetara itzultzea erabaki du, eta herritarrak alde batera uztea».