Euskeraren inguruko hainbat hitzordu izango dira Astigarragan, datorren astean zehar, Udalak eta AEK euskaltegiak antolatuta. Horrela, asteazkenean, euskeraren jatorriari buruzko hitzaldia eskainiko du Josu Urrexolak, Zilegi Eskolen barruan. AEKren Nabarra Oñatz kaleko lokalean izango da, arratsaldeko 19:00etan, eta doakoa da bertaratzea.
Hori baino lehen, ordea, beste bi saio ere izango dira, Gurasolagun egitasmoan. Astelehenean, kafe baten bueltan elkartuko dira haurrak eta gurasoak, euskeraz hitz egiteko, 16:30etatik 18:30etara. Irekia da, eta edozein euskera maila duten herritarrak azaldu daitezke; euskeraz hitz egiteko gogoa besterik ez dute eskatzen.Eta asteartean, tailerra antolatu dute, Gurasolagun egitasmoan hori ere, eskumuturrekoak eta lepokoak egiteko.
Tratu onei buruzko hitzaldia, hilaren 22an eta 23an
Urtarrilean bertan, beste hitzaldi bat ere antolatu dute, Zilegi Eskolen barruan. Arremanitzeko Maialen Gartziak eskainiko du, tratu onei buruz: urtarrilaren 22an 19:00etan, eta 23an 09:30etan, AEKn. Doakoa da, baina izena eman behar da aurrez, zilegieskola@aek.eus helbidean edo kultur etxean.