Atzo onartu zuen Astigarragako Udalak, 2020rako Udal Aurrekontua, EH Bilduren aldeko botoekin eta PSE-EEren abstentzioarekin; EAJ-PNVk bozkatu zuen kontra. Eta horrenbestez, datorren urterako 9.291.408,11 euroko aurrekontua izango du Udalak.
2020ko aurrekontua bezain inportantea izango da, hala ere, aurretik datorren gerakina kudeatzea, Xabier Urdangarin alkateak eta Andoni Gartzia ogasun zinegotziak azaldu dutenez: «tokatu zaigu 2020ko aurrekontua prestatzea, baina baita ere 2019koa kudeatzea, eta horren gerakina. Badira inbertsio asko 2020an egin edo hasiko direnak, baina kasu askotan 2019koak dira. Eta horrek buruko min dexente ekarri dizkigu; zorionez, dirua egon bazegoelako. Baina hori ez da seinale ona. Izan ere, udaletxe batek bere aurrekontuetan diru bat jasotzen duenean, erabiltzeko da».
Horregatik, nabarmendu dute «puzzle joko haundi xamarra» egin behar izan dutela «dena koadratzeko»; ikusteko gerakina nola berrantolatu, «bidean zetozen proiektu batzuk ziurtatzeko eta beste batzuk martxan jartzeko». Azaldu dute, baita ere, proiektu askotarako aurreikusita zeuden kopuruan ez zeudela «ondo aurreikusita», eta gerakinetik hartu behar izan dutela: «adibidez, Arrobitxuloko igogailuarentzat, 600.000 euro zeuden gordeta, eta milioi bat eurotik pasako da. Beste horrenbeste kultur etxe berriarekin; BEZa ordaintzea Udalari dagokio, 1.100.000 euro inguru, eta hori ez zegoen aurrekontuan zehatz-mehatz jasota. Eta berdin kultur etxerako ekipamenduen kasuan, edo Emakumeon Plazaren proiektuan; aurreikusitakoa ez zen nahikoa», diote.
Gerakina, pendiente dauden proiektuak martxan jartzeko
Astigarragako Udalak aurreikusi du, beraz, 2020an erabiltzea, 2017, 2018 eta 2019 urteetako gerakina: «aurreikusitako gauza asko ez ziren egin, eta exekuzio maila oso txikia izan zen». Hori horrela, oraindik kopuru zehatza ez dakiten arren, milioi bat eta bi milioi euro arteko gerakina daukatela kalkulatu dute: «proiektu asko daude gauzatzeko, eta gerakina izango da pendiente dauden proiektu horiek guztiak martxan jartzeko».
Horien artean daude, noski, hezkuntzako hiru proiektuak: «Haur Eskola berrian, asmoa da obrak lizitatzea aurreneko seihilekoan; DBHko urbanizazio lanak, 2020an jarri nahi ditugu martxan; eta Herri Eskola haunditzeko proiektua ere, 2020an idazteko asmoa daukagu», dio Andoni Gartziak. 2020arekin batera hasiko dituzte kultur etxe berria hornitzeko lanak ere, behin eskrituratuta. «Milioi eta erdi inguru izango da hornikuntza. 850.000 euro inguru 2019ko aurrekontuan dauzkagu gordeta, ikusentzunezkoen materialerako; eta gainerakoa, izango dira altzariak, eta sarrerako eta teknologiako kontuak, 2020rako aurrekontutik eta gerakinetik finantzatuko ditugunak».
Gerakina zenbatekoa zein den arabera, uholdeen kontrako inbertsio bat aurreikusi da: «egin behar den lanetako bat da, Goiko Iturriko urak beste nonbaitetik bideratu, Kutxa ingurua ez inundatzeko. Baina milioi bat euroko obra izan daiteke. 2020an ez daukagu dirurik horretarako, baina 2019tik gastatuko ez denarekin, uste dugu horri heldu ahal izango diogula».
Kirol arloan, frontoia, bizikleta pista eta kiroldegiko lanak
Txomiñene frontoiari ere, «buelta bat» eman nahi dio Udal Gobernuak, legealdi honetan: «eta horretarako, 132.000 euro aurreikusi ditugu aurrekontuan. Hori izango da behar nagusiak asetzeko. Teilatuan dauden ur arazoak, harmailetako arazoak... Hezetasun arazo ikaragarriak dauzkate. Menditik datorren ura ez da ondo jasotzen, eta beraz, frontoiaren atzeko aldean dagoen pareta oso kastigatuta dago. Pareta hori pilotatuta dago, zutoin batzuk dauzka sartuta mendiari eusteko; eta oraintxe ari gara hori aztertzen, ez dadin izan konpontzen hasi eta mendia gainera etorriko zaigula. Horren diagnostikoa zein den arabera, diru gehiago inbertitu beharko dugu pareta ondo jartzen, edo ondo egonez gero, frontoia zein aldagelak berritu ahal izango ditugu», azaldu du Xabier Urdangarinek.
Bizikletan ibiltzeko pista edo pump truck delakoa izango da beste nobedade bat: «2018ko aurrekontu partehartzaileetan aukeratu zen, eta Arrobitxulo eta etxe berrien artean egingo da; baina itxaron behar dugu obrak bukatu arte. Iraila aldera izango da hori».
Kirol arloko inbertsio gehiago ere egingo dituzte 2020an; esaterako, 20.000 euro jaso dituzte kiroldegiko bizikletak berritzeko, eta beste 50.000 euro, igerileku txikia haunditzeko: «orain aforoa gainezka dago, eta haurrek ilara egin behar dute piszina txikian sartu ahal izateko. Aztertzen ari gara nola haunditu dezakegun, bikoiztea posible bada hala egiteko. Helburua izango litzateke, ekainerako prest egotea igerilekua», diote.
Baina asmo potoloagoak ere badituzte legealdi honetarako: kiroldegia haunditzeko asmoa daukagu. Horretarako, dagoeneko alokatu dugu lokal bat brigadarentzat, kiroldegitik bertara trasladatzeko, sei hilabeteko epean edo. Beraz, kiroldegiko espazio hori hutsa geratuko da. Ziur aski, Herri Eskolaren haunditzearekin, lokalen bat konpartitu beharko du kiroldegiak momenturen batean; baina epe ertain-luzera, hiru-lau urteko epean, hori erabat kiroldegiarentzat geratuko da. Metro asko dira, eta proiektu bat egin beharko dugu, finkatzeko zein zerbitzu eskaini behar dituen kiroldegiak». Eta horrekin batera, aztertu nahi dute igerilekua estaltzearen bideragarritasuna: «teknikoki ziurrenik bai, baina ikusi behar da zenbat kostako litzaiokeen Astigarragari, igerilekua mantentzea. Errepikatzen den eskaera bat da, eta behintzat nahi dugu ikerketa sakon bat izan, eztabaida herritarrengana zabaldu eta erabakia beraiekin batera hartzeko», dio alkateak.
Txomiñene frontoiari buelta bat eman nahi diogu legealdi honetan. 132.000 euro aurreikusi ditugu 2020rako, behar nagusiak asetzeko: teilatuko ur arazoak, harmailetako arazoak...
Anuska eta Perurena auzoak, eta herribideak
Auzoei dagokienez, Anuska auzoan daukate erronka potolo bat: «aurreneko eta bigarren faseko lanak egin genituen gure legealdian, eta orain irisgarritasun lanak ere jarri dira martxan; baina faltako litzateke erdiko kalearen eta atzeko kalearen urbanizazioa. Emakumeon Plazarekin batera, herriko gune zaharkituena da, eta 25.000 euroko partida bat dago proiektu definitiboa idazteko. Gure asmoa da legealdi honetan bukatzea lanak», dio Gartziak.
Perurena auzoan ere egingo dituzte lanak, 2020an: «aspaldiko eskaera da ludoteka zerbitzua eskaintzea bertan. Frontoian badago lokal txiki bat, inolako obrarik egin gabe, instalazio minimoekin; eta gure asmoa da hori berritzea. Gerakinean badaude 58.000 euro horretarako gordeta, eta 12.000 euro gehitu dizkiogu, aurrera eramateko. Proiektua idazten ari gara, eta gure asmoa da, gutxienez hurrengo urteko aurrekontuen bilera erronda egiterako, lokal berrian egotea. Frustrazio haundia dago auzoan, urteak daramazkitelako eskatzen eta eskatzen, eta ezer gutxi egin delako», dio Gartziak. Horrekin batera, frontoiko argiak ere berrituko dituzte, 80ko hamarkadakoak direlako, eta kontsumoa ere haundia dutelako.
Auzoetako eskaerekin lotura zuzena dauka, herri bideak konpontzeko partidak ere: «astindu bat eman nahi diegu aurten, eta proiektu bat egin nahi dugu, ikusteko zein behar dagoen herri bide bakoitzean. 150.000 euro daude herri bideak berritu eta hobetzeko, eta gure asmoa da, Santiomendira igotzeko bidean, leuntzeko falta diren bi kurbak leuntzea. 2020an ez bada, legealdi honetan behintzat ziur egingo dugu». Konponketak egingo dituzte sagardotegi zeharran ere, Etxeberria eta Ermañara doan bidean, ur bideekin arazoak baitaude. Baina beste herri hainbat bidetan ere behar dira konponketak: «auzoetako eskaerek, askotan, bideekin dute zerikusia. Auzotarrekin hitz egitea oso aberasgarria da, beraiek ezagutzen dutelako ondoen zein behar dituzten bideek. Baina bereziki, eskatzen dutena da egitea. Ondo dago joatea eta bilerak egitea, baina bitan edo hirutan eskatu eta ezer ez egitea... Alperrikako bilerak ez zazkio inori gustatzen».
Santiomendin bertan, espero dute udara baino lehen bideratzea kaxkoaren urbanizazio lanak: «pixka bat atzeratu da proiektua, auzotarrek eskatu zutelako airetik doan telefonia kableatua lurperatzea, eta zentzuzkoa da. Kable pila bat dijoaz airetik», azaldu du alkateak.
Bidebitarteko proiektua, eta plan orokorraren berrikuspena
Beste bi proiektu potolo ere jarri nahi ditu martxan Udalak, datorren urtean. Batetik, Bidebitarte poligonoan lanketa egingo dute, bertako urbanizazioaren berrikuntza osoa egiteko: «epe luzera jarri nahi dugu ikuspegia. Izan ere, zaharkitua dago, kamioiek bertan aparkatzen dute... Gainera, aldiriko trenaren geltokia poligonoaren bestaldean joango da. Eta bertara joateko, bidea egin behar da, hemendik edo handik. Bidebitarten bertan izan dezake pasabide bat, eta hori horrela izango bada, prestatu beharko dugu segurtasun sentsazioa emateko. Orain poligono bat da soilik, asteburuetan ez dabil inor, iluna, hezea...».
Beste proiektua da, Plan Orokorraren berrikuspena: «legealdiko egitasmo bat da, eta hiru urtetan 363.000 euro aurreikusi ditugu; 2020an, 90.000. Lizitazioa martxan da, eta kontratua sinatzean, lau urteko prozesua hasiko dugu, hirigintza plan orokor osoa berrikusteko. Herriarentzat estrategikoa da».
Bi urtetako kopurua, 2020ko aurrekontu partehartzaileetan
Dirulaguntzei dagokienez, alokairurako laguntzak haunditu dira, 40.000 eurora; eta ekimen bat jarri nahi dute martxan, hori sustatzeko. Eta Muttuai Fest antolatzen jarraitzeko, hitzarmen bidez bideratuko dute laguntza aurrerantzean, urtean 30.000 euroko kopuruaz. Gainerakoan, mantendu egin dira herriko elkarteentzako dirulaguntzak. Dirulaguntzekin lotuta, hobari sistema bat ere jarri dute martxan, familientzako: tasak ordaintzeko orduan, familiako kideen arabera gutxiago ordainduko dute, %90etik %20ra bitarteko hobariekin.
Mapa Morearen egitasmoari ere segida emango diote, 60.000 eurorekin. Eta kultur arloan, herriko buruhaundiak berrituko dituzte: «emakumezko figura bakarra dago, eta neskamea da gainera. Beraz, berdintasun lan horretan, emakumezko pertsonaia batzuk sortu nahi ditugu, konnotazio positiboa dutenak», jakinarazi dute.
Bestalde, 2019an ez denez burutu aurrekontu partehartzaileen prozesua, 2020an bi urteetako kopurua jarriko dute, guztira 210.000 euro, herritarrek erabakitzeko zer egin. Otsailean hasita, aurreneko seihilekoan gauzatuko da.
Eta azkenik, pertsonal gastuetan, bi teknikariren lanpostuak pasako dituzte lanaldi erditik osora: enplegu teknikariarena eta berdintasun teknikariarena, bi sailak indartzeko.
EAJ-PNV: «herriarentzat estrategikoak diren proiektuak ahaztu ditu EH Bilduk»
Aurrekontuen kontra bozkatu zuen EAJ-PNVk atzo, «proposamen berririk gabeko aurrekontuak» direla nabarmenduz: «eta gainera, herriarentzat estrategikoak diren proiektuak ahaztu ditu EH Bilduk». Horien artean aipatu du, Uholdeen Aurkako Plana martxan jartzea: «ehun urtez Astigarraga uholdeetatik babesteko plana aurkeztu genuen, eta EH Bilduk ez du zentimorik bideratu arazo larri honi aurre egiteko». Adierazi du, bestalde: «gure alegazioetatik interesgarriak iruditu zitzaizkienak hartu, eta beraienak balira bezala aurkeztu dituzte, alegazioetarako epea amaitu ondoren». Horren adibide gisa aipatu du DBHren proiektua: «gure alegazioari esker, hezkuntzarako diru-partida bideratu da azkenean, nahiz eta beraien aurreneko zirriborroan aurreikusita ez egon».
Eta gaineratu du: «zoritxarrez ahaztuko den beste proiektu bat Santiomendi-Landarbaso Paisairako Plana da. Eusko Jaurlaritzak begi onez ikusten zuen, sariak irabazi zituen, eta paisaian adituak diren profesional askoren atentzioa deitu zuen. Baina EH Bilduk, beldurrez, kajoian sartu du egindako lan bikaina. Ez du nahi Astigarragak aurrera egitea, betikoarekin konformatzen da, kontrolatzeko gai denarekin. Begirada motza izaten jarraitzen dute».
EAJk adierazi du, dena den, «zorionez jarraipena» emango diela EH Bilduk, guk hasitako proiektuei: «Arrobitxuloko igogailua, Herri Eskola haunditzea, Emakumeon Plaza berritzea, tren geltokia... Proiektu guzti horiek EAJk bideratuta utzi zituen ekonomikoki. EH Bildu oso lasai biziko da EAJk egindako lanaz baliatuz; jaso dutenarekin, ez daukate ideia berririk lantzeko inolako presarik. Bideratu dituzte 90.000 euro Plan Orokorra berritzeko, eta 80.000 hondakin bilketaren inguruko azterketa bat egiteko. Beste batzuek egingo dute lan, legealdi honetan».
PSE-EE: «borondate oneko keinu bat egin dugu»
Astigarragako PSE-EE, bere aldetik, abstenitu egin zen: «legealdi berriko aurreneko aurrekontuak dira, eta borondate oneko keinu bezala, erabaki dugu emendakinik ez aurkeztea eta abstenitzea. Uste dugu aurrekontuak onak direla, proiektu politiko berri baten hasiera suposatu dezaketenak; eta balorazioa eginda, erabaki dugu bere horretan uztea».