Kirola egin eta gorputza mugitzeko, zita bikoitza jarri du Mundarro Kirol Elkarteak, egun hauetarako. Gaur bertan egingo dute aurrenekoa, Kirol Eguna ospatuko baitute, Astigarragako kiroldegian. Arratsaldean izango da hori, 16:00etan hasita.
Haurren txanda izango da lehenik, eta erakustaldiak eskainiko dituzte, 17:15ak arte. Eta ondoren, saio irekiekin hasiko dira: Strong eta Jump Fit saioak 18:00etatik 19:00etara; Ziklo Indoor 18:15etatik 19:15etara; eta Hiit, Zumba, Bungee eta Ziklo azkenik, 19:15etan hasita.
Eta bukatzeko, afari batekin eta mozorro lehiaketarekin borobilduko dute eguna. Saioetan zein afarian parte hartzeko, aldez aurretik eman behar zen izena, abenduaren 13ra arte.
Inuxente Kroserako, izenematea egunean bertan
Bigarren zita, iganderako jarri dute, urteroko Inuxente Krosarekin. Arratsaldeko 16:30etan hasiko dira haurren lasterketak, eta 17:30etan izango da helduen txanda, 6 kilometro osatzeko. Guztiak, Kale Nagusitik abiatu eta bertan bukatuko dira.
Haur zein heldu, igandean bertan eman beharko dute izena, irteera gunean, 15:30etatik aurrera. Haurren kasuan doakoa da, eta helduek 5 euro ordaindu beharko dituzte. Opari bana jasoko dute partehartzaileek, eta sariak azkarrenek.