Datorren urtearen hasieran, alokairu sozialeko zazpi etxebizitza zozketatuko ditu Astigarragako Udalak, Aiotzategi kaleko 4garren atarian. Eta dagoeneko zabalik dago izena emateko epea, parte hartzeko.
Urtarrilaren 31ra arte egin daitezke eskaerak, udaletxean. Horretarako, aurkeztu beharko dira honakoak: eskaera orria beteta; familia-liburua eta kide guztien NANaren fotokopia; denen errolda ziurtagiri eguneratua, Udalak egina; diru-sarrerak dituzten guztien 2018ko errenta aitorpenaren fotokopia; edota etxebizitzan biziko diren kideen zerrenda, adina eta diru-sarrerak zehaztuz.
Zozketan parte hartu ahal izateko, urteko diru-sarrerak izan beharko dira 3.000 euro eta 39.000 euro artekoak; baina lehentasuna izango dute 25.000 euro baino gutxiagoko diru-sarrerak dituztenek.
Etxebizitzak, hiru motatakoak
Zozketatuko diren zazpi etxebizitzak, izango dira hiru motatakoak: hiru logelako lau etxebizitza; bi logelako bi etxe; eta beste bat bi logelakoa, baina ezintasun edo desgaitasunen bat dutenentzat egokitua.
Une honetan, okupatuta daude etxebizitza horiek, baina martxoaren 31n bukatuko zaie kontratua, horietan bizi direnei.
Alokairu sozialeko kontratu berriek, zazpi urteko iraupena izango dute; baina urtero errebistatuko da, ziurtatzeko hasierako baldintzak betetzen direla.
Zozketaren oinarriak eta eskaera orriak eskuragarri daude, Astigarragako Udalaren web orrian: astigarraga.eus.