Abenduko zubia aprobetxatuz, Gabonetako pinua apaintzeko zita jarri du aurten ere, Sagardoetxeak. Gaurtik igandera arte, bost hitzordu jarri dituzte, sagardo botilekin osatutako pinu berezia apaintzeko. Sagarrak jarri eta kandelak piztuko dituzte gerturatzen direnek, eta aukera izango dute, baita ere, beraien desioak idatzi eta pinuan zintzilikatzeko. Barrikotea ere izango dute, gaztainekin.
Bost txanda izango dira aukeran: gaur eta bihar, goizeko 11:00etatik 13:30etara, eta arratsaldeko 16:00etatik 19:30etara; eta etzi, goizeko txandan soilik. Helduen kasuan, 5,5 euro izango dira pertsonako, Sagardoetxera bisita gidatua, Gabonetako pinuaren apainketa eta barrikotearen dastaketa. 0-9 urte bitarteko haurrentzat, doan izango da, sagar muztioaren dastaketa barne, baina heldu batekin joan beharko dute. Eta 10-17 urtekoentzat, 3,5 euro dira, sagar muztioarekin eta gaztainekin.
Jatorri alemaniarreko ohitura kristaua da, eta 1.400 urte baino gehiago dauzka. Izan ere, jatorriz, sagar eta kandelekin apaintzen ziren pinuak: tentazioaren ikurra zen sagarra, eta argiarena kandelak. Denborarekin, ordea, bola, argi eta bestelako apaingarriekin ordezkatu dira.
Barrikotea gaztainekin egitekoa, berriz, sagardoaren kulturako usadio zaharra da: garai batean, elaborazio lanak bukatutakoan, barrika bat muztioarekin bete, eta bi aste beranduago festa bat antolatzen zuten, bizilagunen artean barrikotea dastatzeko, gaztainekin.