Hamabi gai mahai gainean zituztela eman zioten hasiera asteartean Astigarragako udal ordezkariek urteko azkenaurreko osoko bilkurari, azaroari zegokionari, hain zuzen. Aho batez onartu zituzten gai-ordeneko 11 puntutik 10. 2020ko udal ordenantza fiskalei aurkako botoa eman baitzioten EAJ-PNVko lau zinegotziek.
%2ko igoera orokorra, «gehiegizkoa»
Aurreko akta onartu ondoren ekin zioten udal zerga eta tasen inguruko eztabaidari. Irailaren 24ko Plenoan eman zioten hasierako onarpena 2020ko Ordenantza Fiskalei, eta helegiteetarako dagokion epea pasata, behin betiko onartu zituzten, EH Bilduren eta PSE-EEren aldeko botoarekin.
Hori horrela, %2ko igoera orokorra izango dute Astigarragako 2020ko udal zerga eta tasek. «Azken sei urtetan ez da igoerarik izan, eta KPIren igoeraren galera konpentsatzeko, poliki-poliki igo behar dira», azaldu zuen Xabier Urdangarin alkateak.
Diru-sarrera gutxien dituztenentzat, «hobari sistema» badagoela azaldu zuen, eta sistema hori, «diru-laguntza sistema batekin orekatzea» dela Udal gobernuaren asmoa.
Igoera horren aurrean agertu zen Nerea Zusberro, EAJ-PNVren bozeramailea: «ez gaude ados %2ko igoerarekin; gehienez %1eko beharko luke». Eta bereziki kritikatu zuen etxebizitza hutsaren errekargoa: «gehiegizkoa iruditzen zaigu».
Arrobitxuloko igogailurako eta DBHrako, aldaketa
Kreditu aldaketari zegokion hirugarren puntuak; udal gobernuak proposatu zuen bi proiektutara bideratzea aldaketa hori: batetik, Arrobitxuloko igogailua egiteko, «gainkostua izan baitu», eta bestea, DBH egiteko.
Taldearen «harridura» islatu zuen EAJ-PNVren bozeramaileak, «2020ko udal aurrekontuen proposamenean ez baitzegoen partidarik DBHrako». Baina «beti» DBHren alde egin dutenez, aldeko botoa emango zutela adierazi zuten. Bide batez, Eusko Jaurlaritzako Hezkuntza Sailarekin duten harremanaz galdetu zion Alkateari.
Urdangarinek erantzun zuen Udal gobernua uztailean bildu zela Eusko Jaurlaritzako ordezkariekin: «bilera horretan ez ziguten esan DBHrik ez zela egingo, baina adierazi ziguten kokalekuak zailtasun batzuk zituela: irisgarritasuna, bata, eta malda, bestea». Horiei aurre egiteko lan teknikoarekin ari direla azaldu zieten, eta azalduko dutela, aurrerago. Bide batez, gainontzeko taldeen «laguntza» eskatu zuen Eusko Jaurlaritzaren «baiezkoa» lortzeko.
Plan Orokorraren inguruan, desadostasun politikoak
Nahiz eta aho batez onartu zuten, desadostasun politikoak sortu zituen, baita ere, Hiri Antolamendurako Plan Orokorra (HAPO) idazteko kontratazio-espedienteari zegokion gaiak.
Xabier Urdangarin alkateak adierazi zuenez, aurreko HAPOa eguneratzeko unea iritsi dela uste du Udal gobernuak, eta idazketa lizitaziora atera dute; kontratu hori berrestea da Plenoaren eginbeharra.
Zusberro bozeramaileak positibotzat jo zuen «generoaren eta euskeraren irizpideak» lizitazioan kontuan hartzeak. Adierazi zuen, baita ere, bere taldea «gogoz» dagoela «ikusteko zein den EH Bilduren eredua».
Andoni Gartzia EH Bilduren zinegotziaren hitzetan, «aurrekoa herritarrei bizkarra emanda egin zen, eta honen helburua da astigartar guztiak asetzea. Uste dugu lortuko dugula».
Gainontzeko puntuak ere aho batez onartu zituzten: 7 etxebizitza alokairu sozialean jartzea, Astigarraga-Hernani eskola kirola eredua, baita Euskararen eta Emakumeenganako Indarkeriaren Nazioarteko Egunaren eta Boliviako estatu kolpearen kontrako adierazpen instituzionalak ere. Eraso matxisten kontrako protokoloak ere jaso zuen adostasuna: «desiragarria litzateke onartu behar ez izatea», esan zuen Alkateak.