Futbol jardunaldi garrantzitsua jokatuko dute Astigarraga eta Hernaniko futbol talde desberdinek. Etxean Preferente mailako Mundarrok eta Hernaniko bigarren taldeek jokatuko dute, baita Euskal Ligako neska hernaniarrek eta etxetik kanpo Ohorezko Erregional mailako Hernanik eta Jubenil Nazionaleko taldeak.
Preferente mailan Mundarrok hiru partidu daramatza garaipenik lortu gabe eta horrek sailkapenean hamaikagarren postura jeistea suposatu du hamahiru punturekin hamaika jardunalditan. Gaur, 19:30etan, Zarkumendegin Axularren aurka jokatuko du eta aukera dago posturen bat berreskuratzeko. Donostiarrak hiru puntu aurretik daude bederatzigarren postuan eta beraz aurkari zuzenen arteko partidua da jokatuko dena.
Maila berdinean Hernaniko bigarren taldeak ere etxean jokatuko du. Ordubete lehenago hasiko da partidua, 18:30etan, Zubipen eta aurkaria Oiartzun. Azken jardunaldiko garaipenak auspoa eman die hernaniarrei eta partiduak irabazi daitezkeela erakutsi die.
Zumarragan eta Zubietan Ohorezko Erregionala eta Jubenil Nazionala
Etxetik kanpo Hernaniko mutilen lehenengo taldeak jokatuko du. Ohorezko Erregional taldeak sei partidu daramatza galdu gabe. Lau irabazi eta bi berdindu ditu partidu horietan eta bolada on horri eutsi nahi dio hamabigarren jardunaldian.
Horretarako Zumarragan, Argixaon, Urolaren aurka berdindu edo irabazi egin beharko du. Partidua gaur jokatuko da, 16:00etan, eta ez da norgehiagoka erraza izango. Zumarragarrak ongi kokatuta daude sailkapenean, bosgarren, Hernani baino puntu bat gutxiagorekin. Hernaniren 21 puntuek hirugarren kokatu dute eta aurreneko bi postuetatik gertu dago. Azken jardunaldietan talde sendoena izan da.
Jubenilek berriz asteko partidurik zailena dute. Hauek ere gaur jokatuko dute, baina goiztiarrenak izango dira. 10:15etan, Zubietan, Reala B liderraren aurka ariko dira.