Datorren ostiralean, azaroaren 22an, da Santa Zezilia eguna; musikarien eguna. Eta hori ospatzeko, Santa Zeziliaren bezperan eta hurrengo igandean jarri dituzte hitzorduak, Astigarragako musikariek.
Ostegunean izango da aurrenekoa, eta urteroko ohiturari eutsiz, Musikalean antolatu du Norberto Almandoz musika eskolak. Arratsaldeko 18:15etan hasiko da ekitaldia. Kalejiran abiatuko dira musika eskolatik, eta betiko ibilbidea osatuko dute, herriko kaleetan barrena, Foru
Plazan bukatzeko.
Eta Foru Plazan bertan izango du segida, Santa Zeziliaren omenezko festak: kontzertuak eskainiko dituzte udaletxeko arkupeetan, 19:00etan hasita. Musika eskolako abesbatza eta pandero taldeak izango dira emanaldia eskaintzen aurrenekoak; Gabiltzanian taldea ariko da ondoren; eta Deblauki taldea, segidan. Eta emanaldiari bukaera emateko, elkarrekin ariko dira denak.
Kalejira eta musika emanaldiak izango dira ostegunean, musika eskolako ikasleen eskutik.
Musikarien eguna beraiekin batera ospatzera animatu ditu Norberto Almandoz musika eskolak, herritar guztiak.
Diana eta txistu emanaldia, herriko txistulariek
Eta Santa Zeziliatik bi egunera, igandean, herriko txistulariak aterako dira kalera, ospakizunetarako. Bat egingo dute Txirriskla taldeko eta Norberto Almandoz musika eskolako txistulariek, eta diana jotzera aterako dira, larunbat goizean.
Eta ondoren, Joseba Barandiaran plazan jarri dute hitzordua, eguerdiko 13:00etan. Txistu emanaldia eskainiko dute bertan, gerturatzen direnentzat.
Musikak hartuko du herria, berriro, Santa Zeziliarekin.