Hezkuntzarekin lotutako hitzaldia izango da gaur, Astigarragan. Waldorf pedagogiari buruz ariko dira bertan, Waldorf elkarte pedagogiko eta kulturaleko kideak. Arrobitxuloko lokalean izango da, 09:30etan hasi eta 13:00ak arte.
Rudolf Steinerren hezkuntza ereduan dago oinarrituta Waldorf pedagogia: «haur eta gazteak askatasunera bidean heztea, gizartearen etengabeko berrikuntza baten barruan», diote. 1861ean jaio zen Steiner, Austrian; eta 1925ean hil, Suitzan. Lehenengo Mundu Gerraren ondoren hasi zen bere eredua aplikatzen, Stuttgarten (Alemania), zigarrillo fabrika baten enkarguz: langileen seme-alabentzako eskola bat jarri behar zuen martxan. Ereduaren arabera, heziketa artea bezala garatu behar da, askatasunean eta sormenean oinarritutako giro batean.
Eredu hura zabaldu egin zen, eta orain, mundu osoan zehar dozenaka eskola dira, Waldorf pedagogia aplikatzen dutenak. Hori bideratzeko eta eredu horrekin bat egiten zuten eskola eta ekimenak batzeko sortu zen Waldorf elkartea, orain urte batzuk. Steinerren ereduarekin lan egingo duten instituzio eta eskolak sortu, mantendu eta garatzen ditu elkarteak.
Eredua zertan datzan azalduko dute gaurko hitzaldian.
Goizeko 09:30etatik 13:00etara izango da, Arrobitxuloko lokalean, Waldorf elkarteak antolatuta.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
Egin zaitez KronikaKide!