Zita berezia izango da Astigarragako kultur etxean, datorren ostiralean: ¡No os importe matar! liburua aurkeztuko dute. Iluntzeko 19:00etan izango da, eta liburuaren egilea bera egongo da bertan, Sabino Cuadra Lasarte, lanaren nondik norakoak azaltzen.
1978ko Iruñako San Ferminei buruzkoa da liburua; eta orduan gertatutako istiluak ditu oinarri; uztailaren 8koak. Hain justu, istilu horietan poliziak tiroz hil zuen German Rodriguez, LKIko kidea. Horren ondorioz, greba orokorra deitu zuten Euskal Herrian, eta istilu gehiago izan ziren, hainbat herritan. Eta uztailaren 11n Donostian egindako manifestazio batean, tiroz hil zuten Joseba Barandiaran astigartarra ere.
Peñen txostena eta duela gutxi desklasifikatutako agiriak, oinarri
Liburua idazteko, Cuadra Lasartek oinarri izan du, batetik, garai hartan Iruñako Peñek idatzi zuten txostena; bestetik, duela gutxi desklasifikatu diren dokumentuak; eta azkenik, arlo ezberdinetan egin diren lan monografikoak. Horiekin, osatu du uztailaren 8ko egun hartan gertatutakoaren kontaketa, aurreko eta ondorengo giroa aditzera emanez, eta gertakariak azalduz, «Francoren diktadura garaian eta Trantsizioa deiturikoan egindako gizateriaren kontrako krimenen testuinguruan kokatuz».
Honela dio liburuaren aurkezpen testuak: «ia hiru urte dira Franco hil dela, baina Frankismoak oso bizirik jarraitzen du. Egun horretan, dozenaka poliziak inguratu dute zezen plaza, bete-bete eginda, hainbat gaztek pankarta bat atera dutenean, amnistia eta presorik gabeko San Ferminak eskatuz. Hori da aitzakia, polizia frankista sartzeko, ahal duen indar haundienarekin. Gomazko pelotak, ke poteak eta balak».
Joseba Asiron Iruñako alkate ohiak idatzi du hitzaurrea.