Datorren asteazkena, azaroaren 20a da Haur eta Nerabeen Eskubideen Nazioarteko Eguna. Eta urtero bezala, hainbat ekintza antolatu dituzte Astigarragako Gaztelekuak eta Xaguxar aisialdi taldeak. Gaur izango dira horietako batzuk, eta asteazkenean bertan ere, egingo dituzte aldarrikapenak.
Gaurkoa izango da egun nagusia. Arratsaldean Joseba Barandiaran plazan elkartu, eta jai giroan ospatuko dute, aldarrikapen eguna. 16:30etan hasiko dira ekintzak bertan. Gaztetxoenek, aldarrikapen murala egingo dute, spraya ez, bestelako materialekin. Eta helduagoek, nerabeek, graffitiak egiten ikasteko tailerra izango dute. Iluntzeko 20:30ak arte izango dira tailerrak.
Gainera, tartean, merienda egiteko aukera ere izango dute, haur eta nerabeek. Izan ere, txokolatada prestatuko dute, arratsaldeko 18:00ak aldera.
Aldarrikapen mezuak, udaletxean, kultur etxean, kiroldegian eta ikastolan
Bi tailerren helburua izango da, haur eta nerabeen eskubideak aldarrikatzeko mezuak jartzea. Eta mural horiek, aldarrikapen mezuekin, udal eraikinetan jarriko dituzte asteazkenean, Haur eta Nerabeen Eskubieen Nazioarteko Egunean.
Zehazki, udaletxeko balkoian, eta kultur etxeko, kiroldegiko eta Herri Eskolako sarreretan zintzilikatuko dituzte muralak.
1954an hasi ziren Haur eta Nerabeen Eskubideen Eguna aldarrikatzeko adin txikikoak diren bitartean, arreta eta babes berezia jasotzeko duten eskubidea. Orain arte lortutakoa ospatu, eta oraindik egiteko dagoena aldarrikatzeko eguna da. 1948an azaleratu zituen Nazio Batuen Erakundeak, aurrenekoz, haurren eskubideak.