Fibrozementuzko hondakin eta objektuak biltzeko zerbitzua izango dute eskura, bihartik, astigartarrek. Printzipioz hilean behin, aurreneko astelehenean, jasoko dituzte mota horretako hondakinak, Garberako garbigunean. Izan ere, horretarako protokolo bat ezarri du San Marko Mankomunitateak. Kontuan izan behar da, garai batean amiantoa erabiltzen zela, fibrozementua egiteko.
Goizez zein arratsaldez eraman ahal izango dira hondakinak, 10:00etatik 13:00etara, edota 15:30etatik 18:30etara.
Kantitate haundietarako, baimen berezia behar
Astigarragako Udalak jakinarazi du, hori bai, eramandako materiala ezin dela hauskorra izan, eta egoera onean egon beharko duela, desmontatu beharrik gabe. Gainera, kantitate txikiak behar dute izan, ibilgailu berezirik gabe garraiatzeko modukoak, eta manipulagarriak. «Honako gehienezko neurriak eta kantitateak izango dira: bi fibrozementuzko plaka (4 metro karratu eta 50 kilotik beherakoak); 3 metrora arteko hodi zati bat; bost jardinera; eta 30 kilora arteko elementu apaingarriak edo bereziak», azaldu du Udalak.
Hortik gorako kantitateak izanez gero, «baimen berezia» eskatu beharko dute erabiltzaileek, San Marko Mankomunitatean: 943 21 49 77. «Erabiltzaile partikularren hondakinak bakarrik onartuko dira, eta beraz, udal bilketako enpresek, industria orokorrak eta saltokiek ezingo dituzte hondakinak eraman», azaldu dute.
Garbigunean, inprimaki bat bete eta NANa aurkeztu beharko dute erabiltzaileek, eta ondoren, ibilgailuan eraman hondakinak, horretarako mugatutako eremura. Langile espezializatuek emango diete arreta.