Espero baino partaide gutxiago izan da Gazte Asanbladak antolatutako pala txapelketa mistoan, baina «giroa ona» eta «partaideen sentsazio positiboa» nabarmendu dituzte antolatzaileek. Hala ere, «maila oso ona» izan dela ere gehitu dute, eta noski, izan da irabazlerik: Mungia eta Vazquez izan dira txapeldunak eta herriko taberna batean otordu bat egiteko txartela jaso dute sari. Finala «oso orekatua» izan zen, eta «tentsioduna, azken momentura arte ezin baitzen jakin nor gailenduko zen».
Ostiral gauean eta larunbat goizean jokatu ziren partiduak, eta denetan izan zen giroa oso ona. Hala ere, «herritarrik gerturatu ez izanak pena» eman dio Gazte Asanbladari. Gauzak horrela, datorren urterako berriro ere txapelketa antolatzeko asmoa azaldu dute, «beste formatu batean, ea jende gehiago animatzen den, gazte zein ez hain gazte».
Altsasuko gazteak, gogoan
Finala jokatuta, larunbatean autobusa atera zen herritik Iruñeara, Altsasuko auziperatuen aldeko elkarretaratzera. «Besteetan ez bezala, gazte asko elkartu» zen autobusean.
Bueltakoan, Zipotzan bukatu zuten, «giro oso goxoan».
Hurrena, Upelio Eguna
«Gehiagorako gogoz» ere geratu dira, eta horregatik, hain zuzen, abenduaren 14rako Upelio eguna antolatzen hasi direla ere jakinarazi dute. Festa giroan pasako duten egun hori, 80eko hamarkadan girotua egongo da.