Asteartean bildu zen udal osoko bilkura, hileko azken asteartero bezala. PSE-EEko zinegotziaren faltan, EH Bildu eta EAJko zinegotziek landu zituzten gai-ordeneko 10 puntuak. Aho batez onartu ziren gehienak, baina desadostasunak izan ziren 2020ko udal aurrekontuei hasierako onarpena ematerakoan, 2020-2023ko diru-laguntzen plan estrategikoaren inguruan eta kale izendegiaren aldaketaren inguruan.
Ekarpenak jasota, 2020ko udal aurrekontua
Plenoa irailaren 24ko akta onartzearekin hasi zuten. Abstentzio batekin onartu zen. Segidan, 2020ko udal aurrekontuei eman zitzaien hasierako onarpena, EH Bilduren aldeko eta EAJren kontrako botoekin, eta behin GAOn (Gipuzkoako Aldizkari Ofiziala) argitaratuta, jendaurrean jarriko da.
Xabier Urdangarin alkateak azaldu zuen 2020ko udal aurrekontua 9.291.408,11 eurokoa izango dela, «2019koa baino %3,99 haundiagoa. Gehien igo direnak izan dira transferentzia arruntak (besteak beste, diru-laguntzak, %5,77 igo direnak), eta inbertsioak (%54,06 igo dira)».
Aurreikusitako ekimen «aipagarrienak» ere nabarmendu zituen. «EH Bildu, udal-gobernua eskuratu duenetik, lanean erabat murgildu da, eta 4 urteetako paralisiaren ondoren, 2020 urtea aspalditik egiteke dauden proiektuak behingoz gauzatu eta herritarren eskaera betegabeak asetzeko urtea izan dadin esfortzua egingo du». Horrela, 2019ko gerakina eta 2020ko aurrekontua uztartuta, egingo diren hainbat lanen berri eman zuen. Auzo eta landa eremuari dagokionez, Perurenako auzo-elkartea egokitu eta frontoiko argiztapena berritu; landa eremuko garraio zerbitzua jarri; baserri atarietako argiteria eta seinaleak jarri eta diseinatu; hiritartzeak landu Santiomendi kaxkorako, Emakumeon Plazarako eta Anuskarako; eta herri bideen berrikuntza proiektua eta Arrobitxuloko igogailuarena idatzi. Kirol instalazioei dagokienez, kiroldegiko aireztatze sistema aldatu, igerileku txikia haunditu eta bizikleta berriak jarri; Txomiñenea frontoira datozen urak jasotzeko lanak eta frontoia berritu; pump truck pista egin; eta kiroldegia berritu eta igerileku estalia egiteko bideragarritasuna aztertzeko proiektua egin. Hezkuntza arloan, herri eskola haunditu, DBHrako Anibarko lurrak hiritartzea eta Kiriketa Haur Eskola berriaren obra egitea. Kulturan, berriz, kultur etxe berria hornitu eta egitura berria prestatzea, «kostua uste baino haundiagoa izango baita». Azkenik, azpimarratu zuen sail batzuk indartuko direla udalean: berdintasun teknikariaren lanaldia haundituko da lanaldi osora; berdin, enplegu eta komertzio teknikariarena; eta baserritar batzordea berreskuratuko da. Euskera lantzeko Topagunearekin harremana estutuko dela ere zehaztu zuen.
Aho batez onartu ziren udal langileen soldata igoera edota Emakumeon Plazaren berrurbanizazioa.
Hori guztiaz gain, alkateak nabarmendu zuen herritarren eta alderdien ekarpenak jasotzeko egindako «ahalegina». Hain zuzen, EAJk egindako 12 alegazioetatik 5 onartu dira, 3 osoki eta 2 partzialki. Horren inguruan, Nerea Zusberro, EAJko bozeramaileak «zalantza» agertu zuen, ekarpenak egiteko epearen inguruan, EH Bilduk ez zuela errespetatu iritzita. Idazkariak eta EH Bilduko Andoni Gartzia zinegotziek azaldu zuten «udal gobernuaren borondatez ezarritako epea» zela, «legeak ez duelako eskatzen».
Diru-laguntza plana, hiru urterako
Hurrengo puntuan 2020-2023 urteetarako diru-laguntzen plan estrategikoa onartu zuten berriro, EH Bilduren aldeko eta EAJren kontrako botoekin.
Zusberrok adierazi zuen kontrako botoa emango zutela jeltzaleek, ez zeudelako ados, besteak beste, sagardotegietarako autobus zerbitzua kentzearekin. Alkatearen esanetan, zerbitzu hori «erabiltzaileek edo sagardotegiek ordaindu beharrekoa da». Era berean, nabarmendu zuen ia milioi bat euro bideratuko zirela diru-laguntzetara.
Aho batez, hots kutsadura eta soldata igoeren alde
Gainontzeko puntuetan, desadostasun bakarra kale izendegiaren aldaketak sortu zuen. Tranbia ibilbide ondoan sortutako kale berriari Izaskun kalea deitzeko proposamenak, hain zuzen, Zusberroren esanetan ez zelako kultur batzordetik pasa.
Aho batez onartu ziren gainerakoak: aurrekontuen legeak jasotzen duenaren arabera, udal langileen 2019ko soldatari dagokion azken igoera onartzea; hots kutsaduraren aurka babesteko ordenantzaren 38garren artikuluari aldaketa puntuala egin eta establezimenduetan ekipo kontrolatzaileak jartzea; Gipuzkoako Haur eta Gazteen Sustapenerako Erakundearteko Sarean jarraitzeko akordioa berritzea; Emakumeon Plaza berrurbanizatzeko proiektuaren 1 eta 2 faseetarako lehiaketa martxan jartzea; Putzuetako ur depositotik Zarkumendegira eta garraio hirira ura banatzeko obra proiektua; eta Kataluniako Procésaren aurkako urriaren 14ko epaiaren inguruko mozio bateratua. Bi alderdiek azpimarratu zuten elkarretaratzea ere elkarrekin egin izana.
Azkenik, galdera eta eskarien puntuan EAJk adierazi zuen hezkuntza batzordea ez dela uztailaz geroztik bildu, eta Herri Eskola haunditzeko proiektuaren berri jakin nahi zutela. Alkateak argitu zuen azaroan egitea espero dutela.
DIRU-LAGUNTZEN PLAN ESTRATEGIKOA (2020-2023)
GEHITU ETA ALDATU DIREN DIRU-LAGUNTZAK (eurotan)
-Hutsik dauden etxeak alokairu sozialeko erregimenean alokatzeko laguntzak: 30.000 euro.
-Tokiko merkataritza sustatzeko laguntzak: 7.000 euro.
- Astigarragako emakumeen inguruko historia jaso, landu eta herritarren eskura jartzeko ikerketa beka: 8.000 euro.
- Nazioarteko lankidetzarako: 60.300.
- Norberto Almandoz musika eskolarekin hitzarmena: 126.748,55.
- Gazte Asanblada: 7.000.
- Herri Eskolak frontoia erabiltzeko: 190.
- DYArekin lankidetza hitzarmena kultur eta kirol jardueretan zerbitzua emateko: 3.000.
EZABATU DIREN DIRU-LAGUNTZAK
-Sagardotegietarako autobus zerbitzua: 7.000 euro.
-Santiomendiko auzotarrentzako garraio zerbitzua: 12.000 euro.
-Alokairu sozialeko erregimeneko etxebizitza libreak alokatzeko laguntza: 5.000 euro.
- DYArekin lankidetza hitzarmena: 3.000.
- Erroakekin lankidetza hitzarmena: 22.875.
- Auzolan Berri programan Gozogintza proiekturako kontratazio laguntzak: 30.000.
MANTENDU DIREN DIRU-LAGUNTZAK
- Turismo alorrean, Sagardun.
- Berdintasun alorrean, Harituz, eta lehiaketa askeean esleitutako programak.
- Euskera arloko guztiak.
- Gizarte Zerbitzuetan, Gure Izarra, Galtzaur, lehiaketa askean esleitutako ekintzak, zerga eta udal tasetarako laguntzak eta harrera familietarako laguntzak.
- Hezkuntza arloan, haur-eskolako hobariak, garraio laguntzak, eta Herri Eskolarekin lankidetza.
- Gazteria sailean, Azstigazte lehiaketarako sariak.
- Kirol arloan, eskola kirola kudeatzeko laguntzak, igeriketa kanpainarako laguntzak, Mundarro, kirol ekintzetarako laguntzak, kirol programetarako laguntzak, eta kirolarientzako laguntzak.
- Kultur eta jai arloan, Aiztondo, Astigar, Txirriskla eta herriko eta auzoetako jardueretarako laguntzak.