2020ko egutegia osatzeko herritarren argazkiak erabiliko dira eta asteazkena da, urriaren 30a, aurkezteko azken eguna. Urriaren hasieran abiatu zuen Udalak lehiaketa. Edonork, adin zein jatorri guztietako herritarrek hartu ahal izango dute parte. Dena den, hainbat baldintza bete beharko dituzte.
Batetik, argazkien gaiarena; Astigarraga gaiaren bueltakoak izan beharko dute argazkiek, hau da, bertako paisaiak, eraikinak, guneak, kaleak, jaiak, ospakizunak edo bertako jendea irudikatu beharko da.
Bestetik, parte-hartzaile bakoitzak ezin izango du 5 argazki baino gehiago aurkeztu.
Sariak, azaroaren 7an
Kultura batzordeko kideek egingo dute argazkien aukeraketa argazkilaritzan aditua den norbaitekin batera. Horiek, irabazlea hautatzeaz aparte, beste 12 argazki ere aukeratuko dituzte, hilabete bakoitzeko bana. Azaroaren 7an emango dute saridunen berri. Irabazleak 150 euroko erosketa bonoa jasoko du, abenduaren 31ra arte Astigarragako ostalaritza, merkataritza edo zerbitzuren batean erabiltzeko. Beste 12 sailkatuek, aldiz, 80 euroko bonoa jasoko dute.