Harituz elkarteak Prostituzioa eta sexu-esplotazioa helburu duen salerosketaren kontra saretzen izenburupean Madejas-Matazak Topaketa Feministak antolatu ditu gaur Donostiako Aquariumean. Bigarren edizioan, gaia «eremu ezberdinetatik» landuko dutela aurreratu dute. 09:00etatik 14:00etara ariko dira eta 16:00etatik 19:30etara.
Ikuspegi abolizionista
Prostituzioa eta sexu-esplotazioa helburu duen salerosketaren kontra saretzen izeneko jardunaldi hauetan, «ikuspegi abolizionista» landuko da, «juridikoki, polizialki, asistentzialki edo komunikabideen arlotik, besteak beste». Hala aurreratu dute sareetan.
Zazpi hitzaldi zazpi hizlari desberdinekin
Hizlari desberdinak ariko dira. Rosa Cabo Bediak hitz egingo du, prostituzioa, feminismoa eta abolizionismoaren inguruan. Arantza Campos, prostituzioari lotutako alderdi juridikoak lantzen ariko da. Hirugarren hizlaria, berriz, Isabel de Ocampo izango da, Serás Hombre dokumentalaren zuzendaria. Hain zuzen, ikus-entzunekoek tresna eraikitzaile gisa izan dezaketen botereari buruz hitz egingo du; «zein funtzio dute, gai hauekiko sentsibilizazioa lantzeko?» egiten du galdera.
Leticia Matarranz, ikuskatzailea, Polizia Nazionalen neurriez ariko da eta APRAMPeko ordezkari bat ere ariko da salerosketa biktimentzako arretaz hizketan. Joseba Iñaki Arteaga, Izaki salerosketaren kontrako batzorde egonkorraren Ertzaintzaren aduraduna eta EHMA (Euskal Herriko Mugimendu Abolizionista) elkarteko ordezkaria Euskal Herrian esku hartzeko eremuaz egingo du hizketan eta Amelia Tiganus, ekintzaile feministak, Emakumeak eta neskak, prostituzioko salgaia: Nola gauzatzen den puta bat? gaia landuko du.
Garbiñe San Miguel kazetaria izango da aurkezlea eta Jessica Murillo, kazetaria berdintasunean eta genero indarkerian bitartekotzan aditua ariko da moderatzaile lanetan.
Astigarragako Harituz elkarteko lehendakaria den Isabel Otero Gloriek egingo du hasierako aurkezpena. Eta ondoren 09:30etan hasiko dira hitzaldiekin.