2020ko egutegia herritarren argazkiekin osatu nahi du Udalak, eta horretarako, lehiaketa jarri du martxan. Urriaren hasieran abiatu zuten, eta hilaren 30era arte aurkeztu ahal izango dira argazkiak.
‘Astigarraga’, gai nagusia
Edonork, adin zein jatorri guztietako herritarrek hartu ahal izango dute parte lehiaketan. Dena den, hainbat baldintza bete beharko dituzte.
Batetik, argazkien gaiarena; Astigarraga gaiaren bueltakoak izan beharko dute argazkiek, hau da, bertako paisaiak, eraikinak, guneak, kaleak, jaiak, ospakizunak edo bertako jendea irudikatu beharko da.
Bestetik, parte-hartzaile bakoitzak ezin izango du 5 argazki baino gehiago aurkeztu.
Eta azkenik, formatu aldetik ere zehaztapenak errespetatu beharko dira: etzanak izan beharko dute, JPG formatuan aurkeztu beharko dira, 5 eta 9 Mb bitarteko pisuarekin eta DN-A4 neurrirako.
Sari-banaketa, azaroaren 7an
Kultura batzordeko kideek egingo dute argazkien aukeraketa argazkilaritzan aditua den norbaitekin batera. Horiek, irabazlea hautatzeaz aparte, beste 12 argazki ere aukeratuko dituzte, hilabete bakoitzeko bana. Azaroaren 7an emango dute saridunen berri.
Irabazleak 150 euroko erosketa bonoa jasoko du, abenduaren 31ra arte Astigarragako ostalaritza, merkataritza edo zerbitzuren batean erabiltzeko. Beste 12 sailkatuek, aldiz, 80 euroko bonoa jasoko dute.