Kataluniako Procésaren kontrako epaia ezagutu ondoren, adierazpen instituzionala egin zuen Astigarragako Udalak, EH Bilduko eta EAJko udal taldeek adostuta. Eta elkarretaratze baterako deialdia luzatu zieten astigartar guztiei, atzo eguerdian, Txingurriko errotondan, Herriari hitza ematea ez da delitu lelopean.
Adostutako testuan, nabarmendu dute ez dela delitua, «demokraziaren adierazpen baketsua gauzatzea, indibiduala zein kolektiboa, eta herriari hitza ematea. Hori horrela, urriaren 1eko erreferenduma tresna demokratiko eta zilegizkoa izan zen, eta Kataluniak eta Euskal Herriak berezko dute etorkizuna erabakitzeko eskubidea». Horregatik, gaineratu dute, ezin direla «justifikatu», Espainiako Auzitegi Gorenak eta Estatuko botereek, Kataluniako agintari eta gizarte eragileei «bizkarreratutako auzia eta ezarritako zigorrak».
Zentzu horretan, uste dute Procésaren aurkako auziak eta epaiak, «Zuzenbide Estatuaren itxuragabetzea» dakartela, eta «ezbaian» jartzen dutela, «espainiar demokraziaren homologazioa nazioartean».
«Euskal herritarrei zuzenean eragiten digu, Espainiaren erantzun bortitzak»
Adierazpenean bertan, azpimarratu dute: «euskal herritarrei zuzenean eragiten digu, Estatu espainiarraren erantzun bortitzak; izan ere, herrien borondatea era demokratiko eta baketsuz erabakitzea mozten du. Eta arazo politikoari, tribunalen indarrez, 155 artikuluaren ezarpenez, edo erabakitze eskubidearen alde egiten dutenei edonolako neurri bidegabeak ezarriz erantzuten dio, irtenbide elkarrizketatu eta negoziatua bilatu ordez, eta herriari galdetu beharrean».
Horren aurrean, Estatuari eskatu diote, espetxean dauden preso politikoak aske utzi ditzala, eta erbesteratu politikoen aurkako auzibideak bertan behera utzi ditzala. Era berean, elkartasuna adierazi diete Kataluniako preso eta erbesteratu politikoei zein haien etxekoei, eta baita Kataluniako herriari eta erakundeei ere. Eta dei egin diete Astigarragako herritarrei, bat egin dezaten «herriari hitza ematearen aldeko ekimen baketsuekin, demokraziaren eta askatasunaren alde».