Zita garrantzitsua dauka bihar, Agin Laburu bertsolari astigartarrak. Gipuzkoako Txapelketari ekingo dio, Irungo Amaia kultur zentroan. Final laurdenetako bigarren saioa izango da, arratsaldeko 17:00etan.
Final zortzirenetatik sailkatu diren sei bertsolarirekin ariko da Laburu: Haritz Mujika, Beñat Lizaso, Maider Arregi, Iñigo Izagirre, eta Unai Gaztelumendi añorgarra, bera bezala Hernaniko bertso eskolakoa. Bost horiek ez bezala, astigartarrak final laurdenetan hasiko du bere ibilbidea, zuzenean, duela lau urte finalista izan baitzen Gipuzkoakoan. Hirugarren sailkatu zen orduan, eta oso gertu izan zuen buruz burukorako pasea, baina azkeneko bertsoaldian, kartzelakoan, egin zuen huts.
Saioaren irabazlea, zuzenean finalerdietara
Biharko saioan, Iban Narbaiza ariko da gai-jartzaile lanetan, eta bost epaimahaikideen artean izango da Amaia Otxotorena ereñotzuarra. Saioa irabazten duen bertsolariak, zuzenean lortuko du pasea finalerdietara. Eta gainerakoek, puntuazioaren arabera: final laurdenetako 30 bertsolarietatik, 18 sailkatuko dira.
Sarrerak, www.bertsosarrerak.eus webgunean daude salgai: helduek 12 euro, eta 6-16 urteko gazteek 5 euro. Geratzen badira, bihar 16:00etatik aurrera takillan izango da aukera.