Astigarragara egingo dute bisita, asteburu honetan, hiru pailazo ezagunek: Foru Plazan izango dira bihar, Gari, Montxo eta Joselontxo; eta Txirinbolo izeneko ikuskizun umoretsua eskainiko dute bertan, arratsaldeko 17:00etan hasita.
«Ilusioz eta alaitasunez betetako maleta eta kutxak hartuta» etorriko dira Astigarragara, eta baita tresna eta asmakizun bitxiekin ere, «abentura berriez gozatzeko aukera emango digutenak», aurreratu dute. Guzti horrekin, magia, musika, zirkua eta pantomima uztartuko dituzte hiru pailazoek, eta beraien ateraldiekin, gozaraziko dituzte haurrak.
Ordubeteko saioa, ‘zirkuan’
Zirkuko pista batean kokatuko dute ikuskizuna, eta umore garbiaren bitartez, ikusleen barrea bilatuko dute hiru pailazoek, zirkuan girotutako munduan murgilduz.
Ordubeteko saioa izango da, eta komeriaz betetako istorio berriak ekarriko dituzte, Gari, Montxo eta Joselontxok.
1995an hasi ziren hiru pailazoak, eszenatokiz eszenatoki saioak eskaintzen. Astigarragan egingo dute parada, bihar.