Ostegunean bildu ziren hainbat herritar udaletxean, Berdintasun zinegotzia eta teknikariarekin eta Elhuyar Aholkularitza zerbitzuko teknikariarekin, Astigarragako III. Berdintasun Plana diseinatzeko. Udara aurretik, II. Berdintasun Planaren ebaluazioa eta egoeraren diagnostikoa egin zen, eta irailean hirugarrenari begira hasi dira lanean.
Aurreko Planaren diagnostikoa eginda, urte berriari begira erronka batzuk zehaztu dira, eta osteguneko saio irekian ekarpenak egiteko aukera izan zen.
Erronkak gauzatzeko ekarpenak, herritarrek
III. Berdintasun Plana 2020an martxan jartzea da asmoa, eta horregatik, hau diseinatzeko fasean ari dira orain. Hain zuzen, erronka batzuk finkatuta daude, eta azaroa bitartean, herriko hainbat eragilek egin nahi dituzten ekarpenak jasotzen ari dira.
Hasteko, erronkak zehaztu dira. Batetik, Udalean genero-zeharlerrotasunez lan egitea; hau da, genero-berdintasun ikuspegia arlo guztietan txertatzea.
Bestetik, baliabide eta azpiegitura gehiago izatea, berdintasuna sustatzeko. Era berean, emakumeen ahalduntzea lantzeko beharra azpimarratu da, bizitzako alderdi desberdinetan, eta horrekin nolabait lotuta, beharrezko jotzen da emakumeen parte-hartzea eta ikusgarritasuna lantzea, kirol arloan.
Bestalde, hezikidetza eta berdintasunari lotutako gaiak lantzeko beharra ere jaso da. Astigarraga herri gaztea dela kontuan hartuta, oinarritik lan egiteko asmoa azaldu da, horrela. Horrekin lotuta, gizonekin maskulinitatearen inguruko lanketa egitea ere beharrezkotzat jotzen da.
Azkenik, indarkeria matxistari aurre egiteko, prebentzio lana egitea ezinbesteko erronka da, eta baita indarkeria matxista jasotzen duena artatzeko baliabideak sendotzea ere.
Abenduan jendaurrera, martxan jarri aurretik
Udalak martxan jarri nahi duen III.Berdintasun Plan hau deiseinu fasean dago orain. Erronkak zehaztuta daudenez, herritar eta eragileen ekarpenak jasoko dira azarora arte, eta asmoa da, abenduan prozesuaren inguruko balorazioa egitea, eta Planaren berri herritarrei ematea.
Horrela, Plana 2020an martxan jarri ahal izatea espero da.
Familiarekin tailerra, eskolan
Ekarpenak egiteko osteguneko bilera ez zen izan berdintasun sailetik aste honetan antolatutako ekitaldi bakarra. Horrez gain, ostegunean bertan tailerra antolatu zen eskolako atarian, familiei zuzenduta.
Bertan, helburua izan zen, haur eta gurasoak elkartuta, indarkeria matxistari aurre egiteko tratu onak sustatzea. Tratu onen txinpartak izenburupean, jolasak, kantuak, ipuinak, marrazkiak... erabili zituzten.