Udalak argazki lehiaketa jarri du martxan, 2020ko udal egutegia osatzeko behar diren 13 irudiak aukeratzeko; bat azalerako izango da, eta gainerako 12ak, hilabete bakoitzerako bana.
Dagoeneko ireki da parte hartzeko epea, eta urriaren 30ean bukatuko da. Sari banaketa, azaroaren 7an egingo da.
Herriarekin lotutako irudiak
Edonork hartu dezake parte argazki lehiaketan, adina eta jatorria edozein direla. Parte-hartzaile bakoitzak, gehienez, bost argazki bidali ahal izango ditu.
Argazkiek Astigarraga izango dute gaia. Hau da, herriko paisaiak, eraikinak, guneak, kaleak, jaiak, ospakizunak edota bertako jendea agertu daiteke. Era berean, argazkiek etzanak, hau da, horizontalak izan behar dute. JPG formatuan eta 5Mb eta 8Mb bitarteko pisua dutenak aurkeztu behar dira, DIN-A4 neurrirako. Pen-drive batean eraman daitezke kultur etxera, edo nahiago bada, astigarraga.kultura@gmail.com helbide elektronikora bidali. Argazkiekin batera, egilearen datuak eman beharko dira: izen-abizenak, herria, telefono zenbakia eta, adin txikikoa izanez gero, adina. Mezu elektronikoa bidaliz gero, lanak jaso direla jakiteko, mezu bidez erantzungo da.
300 euro arteko sariak
Bidaltzen diren lanen artean egutegia osatuko duten 13ak aukeratzeko, kultur batzordeko kideak bilduko dira, argazkilaritzan aditua den norbaitekin batera. Denera, 13 argazki aukeratuko dira.
Horietako bat, azalerako izango da, eta egileak 150 euroko erosketa bonoa jasoko du, sari. Gainerako beste 12 argazki aukeratuen egileei, 80 euroko erosketa bono bana emango zaie, baina egile batek, gehienez ere, 300 euroko bonoa jasoko du. Bono horiek Astigarragako denda, jatetxe, zerbitzu edo enpresetan erabiltzeko izango dira, abenduaren 31 baino lehen.
Egutegiak, abenduan
Argazki aukeratuekin osatutako 2020ko udal egutegia abenduaren 16tik aurrera izango da eskuragarri udaletxean eta kultur etxean, eta Astiko merkatarien elkarteko bezeroen artean banatuko da.