Astigarragako Santio jaiek herri kirol txapelketa, Gipuzkoako Harri Txikien Txapelketa, jasoko dute etzi, Santa Ana egunez Txomiñenea frontoian, 17:30etatik aurrera. Dudarik gabe herri kiroletan dagoen txapelketarik sonatuenetakoa. Gainera zapore berezi batekin dator, bertan lehiatuko baitira Euskal Herriko azken bi txapeldunak; Aimar Irigoien eta Mikel Lopetegi ?Urra?. Orain urte gutxi arte Irigoien jaun eta jabe izan da eta aurkariek urrutitik begiratzen zuten, baina azken urteetan, nahiz eta oraindik txapelak irabazi, aurkari oso gogorrak irten zaizka. Alde batetik, Inhar Urruzuno ondarrutarra eta bestetik Urra zarauztarra. 22 urteko harrijasotzaile honek iaz Euskal Herriko Harri Txikien txapelketa irabazi zuen azaroan, Irigoien gaindituz eta gainera marka berria ezarriz. Orain hamar egun ere berdina gertatu zen eta Urrak bigarren euskadiko txapela jantzi zuen Alegian.
?Urra? da faborito bigarren aldiz Euskadikoa irabazi eta gero
Gipuzkoako Harri Txikien azken 12 urteetan bi txapeldun bakarrik ezagutu ditu eta horietako batek, Aimar Irigoienek hamaika aldiz irabazi du. 2007tik 2018ra urtero, 2014an ez beste. Urte horretan Jexuxmari Iruretagoiena Izeta III.ak lortu zuen txapela. Irigoienek ez zuen parte hartu. Urteetan txapeldun bakarra ezagutu du, Aimar Irigoien, baina oraingoan ez da faborito izango eta errebantxa bilatu nahiko du. Aurten hamabigarrenaren bila ariko da, baina ez du erraza izango, alderantziz, Urrak erakutsi du gainetik dagoela momentu honetan.
Maila ezin hobeko txapelketa antolatu da eta bi faborito nagusienekin batera ariko dira beste bost harrijasotzaile: Imanol Albisu Goikoetxe (lesiotik errekuperatzen bada), Mateo Coloma, Iñigo Eizagirre Eiza, Hodei Iruretagoiena Izeta IV eta Xabat Olaizola.
Euskal Herriko eta Gipuzkoako Harri Txikien txapelketetan lanak ez dira berdinak izaten. Gipuzkoakoan harri bat gutxiago erabiltzen da, 125 kiloko laukizuzena, baina beste hiru harriak berdinak dira; 125 kiloko zilindro berria edo kopa, 112,5 kiloko kuboa eta 100 kiloko bola. Eta txandak beti hiru minutukoak izaten dira.
Pasa den urtean Urrak ez zuen parte hartu azken momentuko lesio baten ondorioz. Markarik hoberena formatu honetan Aimar Irigoienek lortu zuen 2017an, 9.737,5 kilo eta 86 altxaldirekin. 2009an lortu zuen bigarren markarik hoberena 9.612,5 kilorekin eta aurreko urtean lortu zuen hirugarren markarik altuena 9.412,5 kilorekin. Ez litzateke harritzekoa izango beraz, aurten errekor berria egingo balitz.
Alegiatik, Astigarragara salto; Euskadikotik, Gipuzkoakora
Orain dela hamar egun, Alegiako Larraitz auzoko plazan, Euskadiko Txapelketan parte hartu zuten sei harrijasotzaile, Astigarragan egongo dira, ikuskizuna ziurtatuz. Orduan, Mateo Coloma ez zen egon, eta bere ordez Inhar Urruzuno ondarrutarra aritu zen. Orain, bizkaitarrak ezin du parte hartu. Emaitza haiek kontutan hartuz gero, sailkapenean bi faboritoak egon beharko lukete lehenengo bi postuetan; ondoren sailkatu ziren Urruzuno, Izeta IV, Eiza eta Olaizola.
Taldeen arteko lehia ere egongo da Santa Ana egunez
Astigarragako Santiotan, Santa Ana egunean, ere ez dira faltako beste herri kirol motak. Eta herriko kirolariak ariko dira, beste urteetan bezala froga desberdinekin ikuskizuna eskainzen. Herriko aizkolari gazteen arteko desafioa dago Markel Zapiain, Axel Larrañaga, Suharri Paolla eta Jokin Urretabizkaiarekin eta goizean idi demak eta bertsolariak.