Nominak ordaintzea exijitzeko, lanuzteak egin dituzte aste honetan, Geka enpresako langileek, 09:30etatik 10:45etara eta 18:30etatik 19:30etara egunero, lantokien aurrean kontzentrazioak eginez, eta manifestazioak Oiartzungo bi lantokien artean. 65 langile dauzka enpresak, hiru lantokitan; Astigarragan bat, eta Oiartzunen bi. Gekako enpresa batzordeak jakinarazi du, jakin dutela enpresak hartzekodunen lehiaketa tramitatu duela Donostiako Epaitegian; «baina oraindik ez dago lehiaketaren autorik, eta enpresak ez dauka likidezia arazorik, langileei soldatak ordaintzeko», salatu du. Urriaren 8tik 11ra bitarte egin zituzten aurreneko protestak langileek, 13:30etatik 14:30etara elkarretaratzeak eginez, Oiartzungo Zerradiko poligonoan daukaten lantokiaren kanpoaldean. Gogorarazi dute, gainera, apirilean ere egin zituztela protestak, bost langileren kaleratzeagatik.