Asteazkenean ez, ostegunean egin zuen Astigarragako Udalak, ikasturte berriko aurreneko Plenoa. Eta bozkatu ziren gai guztiak onartuta, partehartzearen inguruan sortu ziren eztabaidak, bereziki. Besteak beste, Partehartze Ordenantzaren aldaketa onartu zutenean.
Uztaileko Plenoko akta aho batez onartu ondoren, 2019rako zerga ordenantzak ere aurrera atera zituzten, baina EAJren sei botoekin bakarrik. Izan ere, abstenitu egin ziren EH Bildu eta PSE-EE, alegazio bidez aldaketak proposatuko dituztelako.
Partehartze Ordenantzan, bi aldaketa
Eta segidan, heldu zioten Partehartze, Informazio eta Gardentasun Ordenantzaren aldaketari. Zehazki, bi aldaketa proposatu eta onartu ziren, EAJ eta PSE-EEren botoekin; biak ere, 31garren artikuluan: aurreneko atala ezabatu da, zioena 9.000 eurotik gorako kontratazioetan, gutxienez hiru aurrekontu eskatu behar dituela Udalak (orain legeak zehaztutakoaren arabera egingo da, 15.000 eurotik gorakoetan, alegia); eta bigarren atala aldatu da, 5.000 eurotik gorakoen informazioa ematera behartuz Udala, eta ez 9.000 eurotik gorakoetan, orain arte bezala.
EH Bilduk kontra bozkatu zuen, eta Andoni Gartziak azaldu zuen, «gardentasunaren bidean ez dijoan neurria» dela aurrenekoa: «gure apustua izan zen exijenteagoak izatea legearekin. Zuen erabakia izan da exijenteak ez izan eta gardentasunean atzerapauso bat ematea». Zorione Etxezarraga alkateak erantzun zion, horrela lege eta partehartze betebeharrak betetzen direla, eta Jon Arregi ogasun zinegotziak gehitu zuen, ordenantza aldatuko dela legeari erantzuteko, baina praktikan ez duela ezer aldatuko: «operatiboagoak izateko egin da aldaketa». Emaila enpresa bati bidali beharrean, hiru enpresari bidaltzea besterik ez dela erantzun zion Gartziak.
Hurrengo puntuan, alkateak azaldu zuen Astigarragaren esku geratu direla, Elio-enea eta Larraburu baserrien jabetzako lurrak, eta Udalaren esku dagoela zer egin. Gartziak salatu zuen, asko kosta zaiola Donostiako Udalari, «eskaera honi erantzun eta epaia betetzea. Aurreko legealdian hasi genuen prozesu hori, muturreraino eramateko asmoarekin. Hala ere, esatea Udalaren esku dagoela bertan zer egin, barre egitea da; dagoeneko badakigu zati haundi bat Aldundiak hartu eta kamioientzako aparkalekua egingo duela».
Ondoren, aho batez onartu zuten, udal langileen soldaten igoera: %1,5 igoko dira 2018ko urtarrilaren 1etik, eta beste %0,25 uztailaren 1etik hasita.
Aho batez onartu zuten, udal langileen soldatak igotzea; %1,5 2018ko urtarrilean hasita, eta %0,25 gehiago uztailetik.
Ergobia ibilbidearen aldaketarekin, eztabaida
Beste gai batek ere piztu zuen eztabaida: Ergobia ibilbidearen aldaketa puntuala. Onartu egin zuten, EAJ eta PSE-EEren aldeko botoekin, eta EH Bilduren kontrakoekin: «partehartze prozesu barregarria egin zen, alegazio epetik kanpo egin zen herritarrekin saioa. Gainera, testuak akats larriak ditu; teknikoari esan genion, baina akatsek hor jarraitzen dute, eta horrela onartuz gero, arazo larriak ekarriko dizkigu. Badirudi promotorak eta Udal Gobernuak presa daukazuela proiektua aurrera ateratzeko», salatu zuen Gartziak.
Etxezarragak azaldu zuen, oraingoz antolaketa bakarrik ari direla aztertzen, eta informazio bilera zela herritarrekin egin zutena; «baina gero, herritarren ekarpenak jaso eta txertatzeko konpromisoa hartu dugu».
Ubarburuko zabalpenari ere eman zioten onarpena segidan. Eta azkenik, aholkularitza eta defentsa juridikoaren zerbitzua Araudi SLP enpresari esleitzea erabaki zen, EAJ eta PSE-EEren botoekin; abstenitu egin zen EH Bildu.
Autobus zerbitzuaren lizitazioaz, galderen puntuan
Galderen puntuan, zenbait gai jarri zituen mahai gainean Gartziak. Autobus zerbitzuaren esleipen prozesuaren inguruan, Udalaren informazio falta salatu zuen: «lotsagarria da mugikortasun zinegotziak ez jakitea zertan dagoen kontua, herriarentzako arlo horretandagoen gai garrantzitsuena denean oraintxe». Alkateak erantzun zion, zerbitzua esleitzen denean egin ahal izango dituztela ekarpenak, legez.
URA agentziaren proiektu berriaren eta kamioien aparkalekuaren inguruan ere galdetu zuen Gartziak. Bietan, erantzun zioten proiektuak bukatu gabe edo behin betiko osatu gabe daudela, eta batzordeetan emango dela horien berri.