Zita berezia zuten txirrindulari astigartarrek, aurreko asteburuan, alebin eta infantil mailetan. Etxeko lasterketan aritu ziren, Txirrindagan Txiki proban, eta ederki ibili ziren!
Alebinetan, bigarren izan zen Amets Goikoetxea nesketan, eta hirugarren Eneko Olveira mutiletan. Bikain aritu ziren beste guztiak ere: Eneko Indo 4garren, Aimar Capdequi 14garren, Markel Galarraga 21garren, Beñat Auzmendi 25garren, Unax Aranburu 32garren, Ekhi Rabanedo 37garren, eta Unai Hernandez 41garren.
Infantilek, berriz, euripean egin zuten lasterketa, eta erorketa asko izan ziren. Horrela, astigartarren artean, Aimar Olasagastik bakarrik bukatu zuen lasterketa, 18garren.
Larunbatean izan zuten lasterketa, kadeteek ere, baina Urretxun. Sekulako euri zaparradak izan zituzten proba osoan zehar, eta ihes eginda iritsi zen Igor Arrieta nafarra, seiko taldetxo baten aurretik. Horien artean zegoen Jaime Romero astigartarra, 6garren izan zena. Enekoitz Azparren atzerago sartu zen, 21garren.
Eta igandean, azkenik, Idiazabal Saria izan zuten jubenilek. Berehala geratu zen jokoz kanpo Telmo Semperena, 15 laguneko ihesaldi batek, bost minutuko aldea hartu zuelako. Ordurako berandu zen, baina bere saiakera egin zuen Semperenak, Ion Ibarluzearekin. Ez ziren lasterketa burura iritsi, ordea, eta tropeleko indartsuenek harrapatu zituzten, Liernian gora. 41garren helmugaratu zen.
Txikienek, Gipuzkoako taldekako erlojupekoa
Gaur, Irunen daukate zita, alebin eta infantilek, Gipuzkoako taldekako erlojupeko txapelketarekin; 16:00etan hasiko dira. Kadeteek, Zarauztarra Saria daukate, 10:30etan Zarautzen. Eta jubenilek, bi zita: Lazkaomendi Proba gaur, 16:00etan Lazkaon; eta Santikutz Saria bihar, 16:00etan Seguran.