Aurreko asteazkenean, Santa Ana egunez, bukatu ziren Astigarragako Santio Jaiak, eta aurtengoaren balorazioa egiteko, bilera irekia deitu zuten ostegunerako. Bertan izan ziren Udal gobernuko kideak, Kultura teknikaria, eta Jai Batzordeko kideak. Hitz egindakoaren berri emateko, prentsa-oharra helarazi du Astigarragako Udalak.
Zorionak, herritar eta bisitariei
Oharrean diotenez, «lehenik eta behin Udal gobernuak zoriondu nahi ditu Astigarragako bizilagunak, eta baita egun hauetan jaiak ospatzera eta gozatzera gure herrira gerturatu direnak ere. Zorionez, eraso sexista eta istilurik gabeko Santio jaiak izan ditugulako aurten». Hori dela eta, jaien balorazio «positiboa» egin dutela diote.
Herritarren kezkak eta proposamenak, azaleratuta
Dena den, jaiak hobetzeko asmoz, hainbat proposamen eta kexa jaso dituztela diote: «Udal gobernuari iritsi zaio Donostia Ibilbideko itxierak eragozpena sortzen jarraitzen duela gure herriko bizilagunen artean. Horrez gain, herritarrek barraken eta txosnen lekualdaketa eskatu dute».
Datorren urterako, bi erronka nagusi
Era berean, datorren urtera begira bi erronka zehaztu dituzte: «Alde batetik, Santio Jaietako daten hautaketa (Santio eta Santa Ana egunak asteazken eta osteguna dira), jaiak gehiegi luzatu gabe. Bestetik, kirol erakustaldi eta ekintza gehiago eskaini, astigartarrek hala eskatuta».