Uztailaren 22an lehertuko dira Santio jaiak Astigarragan, baina asteburu honetan bertan hasiko da giroa pizten. Izan ere, lau ekintza prestatu dituzte horretarako.
Larunbatean, Astigarragako XV. Herri Krosa egingo dute, herriko kaleetan, arratsaldeko 17:30etan hasita. 7,3 kilometroko ibilbidea izango du probak, eta 16 urtetik gorakoek hartu dezakete parte.
Izenematea zabalik dago, www.herrikrosa.eus webgunean; eta egunean bertan ere izango da aukera, Apeztegi plazan, 16:00etatik aurrera.
Zita hirukoitza, igandean
Eta hurrengo egunean, igandean, hiru zita jarri dituzte. Aurrena, Trial Txapelketa jokatuko da Zarkumendegin, goizeko 09:30etan hasita, Pablo Leoneten oroimenez. Euskadiko Txapelketarako ere puntuagarria izango da.
Ondoren, maila haundiko esku pelota jaialdia izango da Txomiñene frontoian, goizeko 10:30etan hasita: Mundarroren pelota eskolako gaztetxoak aurrena; Xala-Sanchez/Loidi-Bergera ondoren; eta Barandiaran-Gurutzealde/Titin III-Aizpitarte azkenik.
Eguna borobiltzeko, Urumea Blues&Jazz Jaialdia izango da, aurten hirugarrenez, iluntzeko 19:00etatik 22:00etara. Mojo Hand blues talde donostiarrak eta FM Trio Goierriko jazz taldeak joko dute, Joseba Barandiaran plazan.