2017ko aurrekontuak herritarrekin landu nahi ditu EH Bilduk, eta helburu horrekin, auzoz auzoko bilera erronda hasiko du gaur. Atzo aurkeztu zituzten helburuak eta bilera-erronden datak.
EH Bilduk azaldu zuen, Udal Gobernuan zein oposizioan, parte hartzearen aldeko apustua egin dutela: «sinetsita gaude dinamika beharrezkoa dela, aberasgarria». Gaur hasi eta azaroaren 30a bitartean egingo dituzte bilera irekiak, auzoz auzo: «urteko balorazio laburra egingo da bileretan, eta segidan, hurrengo urteko lan ildo nagusiak zehaztuko dira herritarrekin. Bertan jasoko dira auzo eta herritarren eskaerak, kritikak eta proposamenak».
‘Parte hartze guneak’, ere bai
Gogoratu zuten bilerak irekiak direla eta edozein herritarrek hartu dezakela parte. Bestalde, eta herritarrengana gehiago gerturatzeko asmoz, aurten Parte hartze guneak jarriko dituztela azaldu zuten prentsaurrean: «eremu horietan, herritarrek informazioa jaso eta modu erraz eta azkarrean bere iritzia eta ekarpena egiteko aukera izango dute». Urumea Berrin, erdigunean, ikastola irteeran, anbulategian eta Norberto Almandoz plazan aurreikusi dituzte, gune horiek jartzeko.
«Garrantzitsua da erabakiak herritarrekin hartzea»
EH Bilduk azpimarratu zuen udaletxeko aurrekontua izaten dela Udalak urtero hartzen duen erabaki garrantzitsuenetakoa: «urtean aurrera eramango diren ekimen eta lanak jasatozen dituen dokumentua da. Beharrezkoa da horrelako erabaki garrantzitsuak herritarrekin batera hartzea eta konpartitzea».
«Udal Gobernuari proposatuko diogu 2017ko aurrekontu proiektuetan sartzea»
Proposamenak jasota, Udal Gobernuari eskatuko diote kontuan izan ditzan 2017ko aurrekontuei begira: «prozesu honetan eta eragileekin egiten ari garen errondan jasotako ekarpen eta proposamenekin, EH Bildutik 2017ko aurrekontu proiektua landu eta osatuko dugu, Udal Gobernuak kontuan izan dezan, eta herritarren ahotsak aurrekontuetan oihartzuna izan dezan.» Gogoratu dute, joan den urtean 24 emendakin aurkeztu zituztela, 1.164.000 euroko balioarekin «auzo eta herritarren proposamenei erantzuteko balio dute. Horregatik gonbidatzen ditugu astigartarrak datozen egunetan egingo diren bileretara».
Kultur Etxea eta herriko espazioak antolatzeko dinamikak, aurrera
Azkenik, gogoratu zuten EH Bildu herriko elkarte eta norbanakoekin ari dela biltzen, Kultur etxea eta herriko espazioak antolatzeko dinamikaren baitan. Atzorako antolatuta zuten bilera azaroaren 29an egingo dutela jakinarazi zuten: «Bertan errondaren ondorio nagusiak aurkeztuko ditugu, eta Udal Gobernuari aurkeztuko diogun proposamena osatuko dugu».
Gaur,
Perurenan, pelotalekuko goiko lokalean, 19:00etan.
bihar,
Santiomendiko kaxkoan, Plazetxe aurreko lokalean, 19:00etan.
AZAROAK 21,
Ergobian, Estanco tabernan. 18:00etan.
AZAROAK 22,
Arrobitxuloko lokalean, Urumea Berri eta Arrobitxuloko bizilagunei zuzendua, 19:00etan.
AZAROAK 24,
Ermaña tabernan, Santiomendi ekialdeko herritarrentzako, 19:00etan.
AZAROAK 28,
Pleno aretoan, erdiguneko herritarrentzako, 19:00etan.
AZAROAK 30,
Oialume auzoko biltokian, 19:00etan.