Espainiako Txapelketa izan da jokoan asteburuan Meridan, infantil eta kadete mailan, eta Aitor Larrañagak, Construcciones Victor Alvaro Slim taldeko kideak brontzezko domina lortu zuen erlojupekoan.
Etxera itzulita, larunbatean IX. Javier Ezenarro Oroigarria jokatu zen Mendaron. 84,5 kilometroko buelta egin zuten partehartzaileek, eta Urko Semperena astigartarra 30 kilometroko eskapadaren parte izan zen, proba hasieran. Hainbat txirrindularirekin egin zuen ihes, nahiz eta hauek ezin izan zuten astigartarraren erritmoa eutsi. Iñigo Etxarri taldekidearen laguntza izan zuen beranduago, baina Soraluzeko bigarren pasean pelotoiak harrapatu zituen. Murgiondok irabazi zuen, eta Amonarriz hernaniarra bigarren izan zen; Etxarri taldekidea berriz hirugarren. Urkok, egindako esfortzua nabaritu zuen bukaeran, eta 12garren bukatu zuen.
Kadetetan Arrasateko Sariaren aurreneko edizioa izan zen jokoan igandean. Proba gogorra izan zen: lasterketa azkarra, beroa, Muxibarreko igoera... Telmo Semperena astigartarrak behin baino gehiagotan atakatu zuen, lasterketa hautsi nahian, baina pelotoiak ez zion ihes egiten utzi. Pelotoia osorik iritsi zen portu hasierara. Telmok metro batzuk eman zituen igoeran, ezin izan baitzuen aurrekoen erritmoa jarraitu; datozen lasterketarako gorde zituen indarrak. 31garren postuan iritsi zen.
Kadete eta juniorrek hitzordua, asteburuan
Asteburuan hitzordu berria dute Astigarragako txirrindulari gazteek. Kadeteak Ordizian izango dira, XLIII Txapel Gorri proban, eta Abaltzisketa portua izango dute erronka gisa. Juniorrek berriz igandean dute proba, XX. Aiegiko Udala Saria; Euskal Herriko lasterketa da, 81 km-koa.