Astigarraga eta Hernaniko sozialisten ordezkariek prentsaurrekoa eman zuten ostegunean, «Lurraldebus eta Gipuzkoako Foru Aldundiko Mugikortasun Saila zoriontzeko, baliabideak eta maiztasuna haunditu dituztelako Lurraldebuseko lineatan, Donostia Hernani eta Astigarragarekin lotzen dutenetan».
Bizilagunen iritzia kontuan
Mikel Duran eta Ricardo Crespok, Astigarragako eta Hernaniko sozialisten bozeramaileak hurrenez hurren, azaldu zuten «neurri berri hauek bizilagunek egindako iradokizunei esker hartu» direla, eta uste dute «Lurraldebuseko linea hauen berrantolaketak zerbitzuaren kalitatea hobetuko» duela, bi herrietan.
Azaldu zuten erabaki dela «erabilera haundiko lineak indartzea eta zerbitzuko hiru bidaiari besterik ez zituen linea kentzea. Baina ez da erabaki ekonomikoa; bilatu dena izan da garraio publikoa optimizatzea, erabiltzaileen beharretara egokitzen diren zerbitzuak diseinatuta».
Horrela, A3 linea kendu da; «2013ko uztailaren 1ean proba moduan martxan jarri zenetik, bidaiako hiru erabiltzaile izan ditu. (...) Gainkostua zeukan linea zen, 2015ean, 239.756,9 eurokoa, eta irabaziak 20.593,11 eurokoak besterik ez ziren». A1 (Hernani-Astigarraga-Martutene-Donostia) eta A2 (Hernani-Astigarraga-Donostia) lineak, berriz, egunero 17 zerbitzu gehiago eskainiko dituzte.
«Lau urtetan kezkatu ez direnak, orain kexatu»
Mikel Duranek gehitu zuen: «Lau urtetan A3aren okupazio txikiaz kezkatu ez direnak, EH Bildukoak, orain kexatu egiten dira linea kendu delako. 2015ean A1 eta A2ak 500.000 erabiltzaile baino gehiago izan zituzten; A3ak, aldiz, 27.000».