Astigarragako Udalak Radio Taxirekin akordioa lortu du herriko taxi zerbitzua osatzeko. Hori horrela, enpresak erabiltzaileen eta bere taxi-gidarien arteko komunikazioa kudeatuko du. Beraz, Astigarragako taxilaria lanean dagoenean, Radio Taxiko gidariak izango dira zerbitzu gehigarria emango dutenak (gaur egun, Astigarragako berezko taxi zerbitzuak langile bakarra dauka).
Udala pozik dago hitzarmenarekin: «Hitzarmena oso interesgarria da, batez ere, txotx boladari begira, sagardotegiak leporaino beteta daudenean, garraio eskaera areagotu egiten delako».
Udalak gaineratu duenez, sagardo garaian tarifek berdin jarraituko dute. Taxien tarifak urriaren 24an onartu ziren Plenoan, beste herri batzuekin adostu eta gero.
Radio Taxiko telefonoa ere zabaldu du Udalak. Honakoa da: 943 400 500.