Otsaileko azken astean izandako uholdeek dezenteko kalteak eragin zituzten Astigarragako hainbat puntutan, eta Udalak kalte horiek aztertu eta herritarren ekarpenak jasotzeko bilera deitu du gaurko; Udalak Arrobitxulon duen lokalean bilduko dira udal ordezkari eta teknikariak herritarrekin, gaur arratsaldeko 19:15etatik aurrera.
Bereziki, kalteak izan dituzten herritarrei egin diete deia bilerara azaltzeko, baina astigartar guztiei irekia izango da.
Balorazioa osatzeko bilera
Gaurko bileran lau puntu aztertuko dira bereziki: kalteak zein izan diren; Udalak hartutako neurriak eraginkorrak izan ote diren eta zein hutsune izan diren; alertak zabaltzeko protokoloak funtzionatu ote duen; eta herritarrek zein balorazio eginte duten.
Horrekin guztiarekin balorazio orokor bat egitea da helburua.
Kalteak 8 gunetan
Bilera irekia bada ere, bereziki, uholdeek kalteak eragin dizkieten bizilagunak daude bilerara deituta; Ergobiakoak, Txalaka ibilbidekoak, Arrobitxulokoak, Donostia ibilbidekoak, Pelotari kalekoak, Errekatxokoak, Martuteneko bidekoak eta Portutxokoak.