Eguraldiak ez zuen batere lagundu. Euria etengabe egin zuen, eta hotza eta haizea ere presente izan ziren lasterketa osoan. Hala ere, horrek ez zien euskeraren alde korrika egiteko gogoa kendu astigartarrei eta inguruko bizilagunei. Ume eta heldu ugarik hartu zuten parte Euskaraz bizi nahi dut! eta Inuxente Eguneko lasterketan.
Adin ezberdinetako umeek hartu zuten parte: 2-6 urtekoak 11 izan ziren eta 7-12 urtekoak, 23. Gazteetan, 2 lagunek eman zuten izena eta helduekin hartu zuten parte. Hori horrela, nagusien lasterketan 55 lagunek hartu zuten parte. 6 kilometro egin behar izan zituzten horiek. Azkarrenak, Iban Verdugo hernaniarra (22:20) eta Sandra Rodrigo astigartarra (26:50) izan ziren. Gizonezkoetan bigarrena Borja Velez donostiarra izan zen (22:21) eta hirugarrena, Julen Urkiola astigartarra (23:35). Emakumezkoetan, Paki Lizaso helmugaratu zen bigarren (27:40) eta Maria Goya hirugarren (28:18); bi hauek ere, astigartarrak. Denera, 16 emakumezkok hartu zuten parte helduetan eta 53tik 43, astigartarrak izan ziren.
Udaleko Kirol Sailak eta Mundarro kirol elkarteak antolatu zuen lasterketa eta arduradunek eskerrak eman nahi dizkiete bidegurutzeetan egondako kideei, Astigarragako Txirrindulari Taldeari eta Ipintza, Zapiain, Lizeaga, Petritegi, Mina eta Bereziartua sagardotegiei sagardoa emateagatik. «Eta noski, korrikalari guztiei», gaineratu dute. Bideoa, youtuben.