Abenduak 3, Euskararen Nazioarteko Eguna da gaur eta hainbat ekintza antolatu dituzte Astigarragan. Arratsaldeko 15:00etan, antzerki eta kantaldiak antolatu dituzte Herri Eskolako eta AEKko kideek. Kantaldiarekin hasiko dira eta tartean, Euskura, euskara zure eskura antzezlana eskainiko dute. Bukatzeko, kantaldiaren bigarren zatia izango da.
Ondoren, 16:30etatik aurrera, txokolatada, jolasak eta marrazkiak izango dira eskolako patioan, guraso elkartearen eta Xaguxarren eskutik. Herritarrei animatzeko dei egiten diete antolatzaileek eta AEKko kideek honakoa azpimarratu dute: «Gogora dezagun Euskararen Egunak 365 egun dituela eta ez dadila izan egun bakarreko kontua!».
Euskal musika, ‘Aitorren hizkuntz zaharra’...
Beste hainbat ekintza ere egingo dira gaur euskararekin lotuta. Mundarro elkarteak euskal musika jarriko du ziklo indoorreko saioetan. Musika Eskolan, berriz, Aitorren hizkuntz zaharra abestiaren inguruko ariketak egingo dituzte. Eta taberna partehartzaileek euskal musika jarriko dute egunean zehar. Datozen egunetan ere beste hainbat ekintza izango dira.
Udaletxea eta kultur etxea itxita, eta .eus martxan
Udalak, 365 egunez luzatzea nahi du Euskararen Eguna. Eta jakinarazi du, hemendik aurrera, .eus domeinua izango duela. Besteak beste, web orria www.astigarraga.eus izango da. Bide horretan, herritarrei dei egiten die .eus domeinua eskuratzeko: http://www.domeinuak.eus/eu.
Horrez gain, gaur itxita egongo dira udaletxea eta kultur etxea. Eta Euskaraz bizi nahi dugu dioen pankarta jarriko dute udaletxean, abenduaren 10era arte. Bestalde, Udalak herritarrei gogorarazi nahi die edozein hizkuntz eskubide urratua sumatzen dutenean, kexa jartzeko bidea badutela: www.behatokia.org edo http://www.euskara.euskadi.
net/r59-eleb/eu web orrietan, hain zuzen.
Euskaldun berri ala euskaldun zahar?
Gaurko egunaren harira, AEKko ikasle batek idatzi bat egin du.
AEKko ikasle batek, euskaldun berri eta zaharrei buruzko idatzi bat egin du. Astigarragako herritarra da. Orain dela urte batzuk euskara ikasten hasi zen eta, gaur egun, Astigarragako AEKn jarraitzen du, «hau da, euskaldun berria naiz», dio. Eta bere iritziaren berri eman du: «Orain dela urte batzuk arte, bizi genuen egoerak euskaldunok bi multzotan sailkatzen gintuen, alegia, euskaldun zaharrak edo euskaldun berriak. Tamalez, bi zaku horien barruan geunden pertsona guztiok horrela jarraitu izan genuen luzaroan, bakoitza bere taldean. Nahiz eta euskaldun berriok aspalditik euskaraz bizi izan, beste taldekoek berritzat hartzen gintuzten. Gainera, euskalduntze bide horretan, euskaldun zaharrengandik beharrezkoa zen pazientzia nekez jasotzen genuen. Egun, egoera aldatzen ari da, eta leku askotan bi taldeak elkarrekin ekintza politak osatzen ari dira, Mintzalagun esate baterako».
Euskaldun berria izateak alde onak badituela gaineratu du: «Adibidez, euskara batuari buruzko arau aldaketa berriak ezagutzen ditugunez, euskaldun zaharrek baino euskara zuzenagoa eta aberatsagoa hitz egin dezakegu. Orobat, euskaraz bizitzeko gogoa hain handia izaten dugu, ezen asko gozatzen baitugu solasten dugunean». Baina, alde txarrak ere badituela azaldu du: «Zalantzarik gabe, berba egiteko konfiantza lortu baino lehen, lotsaren harresia gainditu behar izaten dugu. Sarritan, hanka sartzen dugu hitz egitean. Halaber, euskaldun zaharrekin naturaltasunez berba egiteko, euskara batuaz ez gara eroso sentitzen eta are zailagoa egiten zaigu. Gauzak horrela, batzuetan besteen irribarreak ere jaso behar izaten ditugu».
Laburbilduz, halaxe dio: «Lehengo euskaldun berriek euskaltegitik kanpo ez zeukaten baliabiderik euskara lantzeko. Horregatik, euskaraz solastean, haien eta euskaldun zaharren arteko aldea askoz handiagoa zen. Orain, berriz, dena daukagu: egunkariak, telebistak, irratiak, internet... Baina batez ere, euskaldun gizartearen atxikimendua. Egun batean bi zakuak batuko dira euskararen alde elkarrekin lan egiteko».
EGITARAUA: Euskararen Eguna
Gaur
15:00, Ikuskizuna kiroldegian.
16:30, Jolasak, marrazkiak eta txokolatada eskolako patioan.
Abenduak 5, ostirala
18:30, Bakarrizketa Gaztelekuan.
18:30, Zine mutua pianoarekin, Musika Eskolan.
Abenduak 13, larunbata
20:00, ‘Potologuak’ antzerkia
kultur etxean.
Abenduak 27, larunbata
16:30etatik aurrera, ‘Euskaraz
bizi nahi dut’ lasterketa.