Astigarragako igerilekuko denboraldia ekainaren 7an hasi zen eta irailaren 7ra arte irekita egongo da. Ekainean zehar, arratsaldetan eta asteburutan ibili ohi da jendea eta nahiko lasai aurkitu du Kronikak, astelehen goizez, Eider Alonso soroslea (socorrista).
Bost urte daramazki sorosle lanetan eta Astigarragan, bigarren urtez ari da zeregin horretan. Uztailean izaten dela mugimendu gehiena dio: «Orain nahiko lasai gabiltza. Arratsaldetan eta asteburutan jendea badabil, baina uztailean desberdina izango da. Jende pila ibiliko da; gaztetxoak, batez ere. Iaz, behintzat halaxe izan zen. Datorren astetik aurrera hasiko da mugitzen. Ikastola bukatuko da eta udalekuetako umeak ere etorriko dira». Abuztua lasaiagoa dela dio, jendeak kanpora joateko ohitura duelako.
Bertakoez gain, Hernanikoek ere joera badutela igerilekura etortzeko azaldu du: «Han badituzte igerileku irekiak, baina hemen lasaiago egoten direlako etortzen dira batzuk».
Bere lanari dagokionean, ez dela inoiz istripu larririk gertatu dio: «Zauri txikiren bat edo beste, hankutsik ibiltzeagatik, baina besterik ez». Eiderrez gain, beste lau sorosle ere badaude: Manex, Jon, Iñaki eta Beñat.
Denboraldiko bonoa egiteko aukera
Igerilekua egunero dago irekita, 10:00etatik 20:00etara. Eguneko pasea ordaindu daiteke, kiroldegiko sarrera litzatekeena, edo denboraldiko bonoa egin.