‘Hackerrak’ izeneko ipuinarekin irabazi du Iñigo Lizarribar astigartarrak Koldo Mitxelena Literatur Saria. D kategorian izan da saritua, hau da, 12-14 urtekoen mailan. Lizarribarrek Arantzazuko Ama Ikastolan ikasten du eta ikastolako beste kide baten ipuina ere saritua izan da. Hain zuzen, Martuteneko Aiora Nicolasen Hil edo bizi ipuinak, aipamena jaso du. Bi gazteek pozik daudela azaldu diote Kronikari. Eta sorpresa izan dela eta harrituta daudela ere bai. Izan ere, 1.720 lan aurkeztu dira denera.
Ordenagailuen munduan eta mundu errealean harrapatua
Hackerrak ipuinaz honako azalpena eman du Lizarribarrek: «Bi hacker elkartzen dira ipuinean. Batek badaki nola lotu ordenagailuen mundua eta benetakoa, mundua kontrolatzeko. Baina gaizki ateratzen zaie eta hacker bat harrapatua geratzen da ordenagailuen munduaren eta benetakoaren artean». Ordenagailuekin oso abila den lagun bat ba omen du eta hortik sortu zitzaion ideia.
Nicolasen Hil edo bizi ipuinak, berriz, honakoa kontatzen du: «Gizon bat da protagonista. Bihotzeko arazoak ditu eta operatu egiten dute. Baina ez dute ondo anestesiatzen eta nola operatzen duten notatzen du. Azkenean, amets gaiztoa da dena», dio Nicolasek.
Euskerako klasean landu dituzte ipuinak, Josune irakaslearekin. «Ideia nagusiak eta forma, klasean landu ditugu eta etxean ere aritu gara», diote.
Bihar izango da sari banaketa eguerdiko 12:00etan, Donostiako Victoria Eugenia antzokian. Oraindik ez dakite ze sari jasoko duten, baina teknologia berriekin zerikusia duen zerbait izango dela badakite, eta gustora dira.