Astigarragako EAJ-PNV udal taldeak Foru Aldundiko Mugikortasun sailari aldaketa bat egitea eskatu dio A2 autobusak Donostia-Hernani noranzkoan egiten duen ibilbidean; hain zuzen ere, Ergobia auzoaren parean. Hernani-Donostia ibilbide berdina egitea nahi da. Txalaka industrialdea zeharkatzen du Troya ibilbidetik eta geltokia du Martindegin: Hernanira itzultzeko autobusak, ordea, ez du bide berdina egiten.
«Nahiz eta Donostiara abiatzen den A2-ak Troya ibilbidetik Txalaka poligonoa zeharkatzen duen, Donostia-Hernani noranzkoan, A2a Ergobiako biribilgunean desbideratzen da eta Hernaniko errepide zaharretik joaten da, Urumearen albotik».
Ibilbidean aipatutako hobekuntza eskatzeaz gain, EAJ-PNVk Diputazioari baita ere eskatu dio azter dezala A2 Donostia-Hernani noranzkoan dijoan autobusak Txalaka industrialdean geltokia izatea, Donostiarantz joaten denak Martindegin geltokia duela kontuan izanda; hain zuzen ere, Astigarragako lehenengo geltokia.
Proposamen horiekin, EAJren gobernu taldearen helburua da «astigartarrek gaur egun duten zerbitzua hobetzea, eta, aldi berean, garraio publikoa erabiltzen duten Txalaka industrialdeko langileei ere euren lan tokira heltzeko erraztasunak ematea».