Eguerdiko 12:00ak iritsi orduko piztu zuten lehenengo suziria Aranon. Jubilatuen elkarteko kideen ardura izan da aurten, eta esker oneko hitzak eskaini zizkieten bertaratutako herritarrei. Suziriez gain, ez zen urteroko goxoki zaparradaren faltarik izan, eta buruhaundiak segituan atera ziren bertako gaztetxoak astintzera.
Arratsaldean festa giroak jarraipen berezia izan zuen Aranon; Erramun Martikorena abeslariaren kantaldia izan baitzuten. Gustura pasa zuten arratsaldea aranoarrek, eta afariarekin borobildu zuten festetako lehenengo eguna.
Gaur ere eguerdi aldera hasiko da mugimendua. Mezaren ondoren Umore Ona dantza taldearen emanaldia izanen da, eta pelota partiduekin amaituko dute goiza. Arratsaldean, berriz, apar festa, txokolatada, altxorraren bila eta Zapotxinen ikuskizuna izanen dira.